Policia konfirmon djegien e tre makinave në veri

Policia e Kosovës ka bërë të ditur se sot janë djegur tre makina të tjera, në Leshak të Leposaviçit por nuk janë me targa RKS.

“Në ora 03:10, policia është njoftuar nga një qytetar serb kosovar, se në Leshak të Leposaviçit, tre vetura të tij (nuk janë me targa RKS),  janë përfshirë nga zjarri,” thekson Policia e Kosovës përmes njoftimit duke shtuar se ka dalë në vend-ngjarje dhe ka inicuar rastin “zjarrvënie” të cilin është duke e trajtuar.

Ndërkohë Presidenca e Kosovës ka reaguar për këtë rast duke thënë se strukturat ilegale të Serbisë tani po synojnë serbët vendas që ata konsiderojnë se po bashkëpunojnë me institucionet e Kosovës.

Më heret janë djegur edhe tetë makina të tjera. Ndaj rasteve të tilla, ka reaguar Qeveria e Kosovës si dhe ambasadorë të vende të ndryshme të akredituar në Prishtinë.

Ndryshe, djegia e makinave në veri po ndodhin vetëm në prag të zgjedhjeve të jashtëzakonshme lokale në katër komunat në veri të Kosovës, që pritet të zhvillohen më 23 prill.