Presidentët Bush dhe Obama nderojnë senatorin John McCain

Ish presidentët amerikanë George W.Bush dhe Barack Obama  kanë nderuar sot senatorin amerikan John McCain, hero i luftës, arkivoli i të cilit u soll në Katedralën e Washingtonit, raporton RFE. Para kësaj, familja e tij kishte kërkuar që arkivoli të ndalonte në Memorialin e Veteranëve të Vietnamit, për të nderuar ata që vdiqën në luftë.

Busha dhe Obama u shoqëruan nga liderë të SHBA-së, zyrtarë të periudhës së Vietnamit, për të nderuar ish të burgosurin e luftës John McCain.

Presidenti Donald Trump nuk ka marrë pjesë në ceremoni, ndërsa anëtarë të administratës së tij, përfshirë vajzën e tij Ivanka kanë qenë të pranishëm.

Familjarët e McCain ishin shprehur se Presidenti Trump nuk ishte i mirëseardhur në ceremoninë e nderimit në Arizonë dhe Washington.

Seantori John McCain do të varroset nesër në kolegjin ku studioi, në Akademinë Detare të SHBA-së në Annapolis të Merilendit.

Senatori amerikan John McCain, hero i luftës vdiq më 25 gusht në moshën 81 vjeçare, pas një beteje të gjatë me kancerin e trurit.