Presidenti Biden fton Vjosa Osmanin në Samitin e Dytë për Demokraci

Presidentja Vjosa Osmani ka marrë ftesë nga Presidenti i Shteteve të Bashkuara të Amerikës, Joe Biden për të marrë pjesë në Samitin e Dytë për Demokraci.

“Përveç fjalimit që do të mbajë krahas krerëve të shteteve të tjera sipas formatit të vitit të kaluar, sipas ftesës, Presidentja Osmani është përzgjedhur edhe në mesin e dhjetë liderëve që do të jenë folës kryesor në seancën plenare në të cilën do të diskutohet për rolin e demokracisë në krijimin e institucioneve stabile, thekson Zyra e Presidentes së Kosovës përmes një njoftimi.

Samiti pritet të mbahet më 29-30 mars në formatin virtual, me mbi 100 vende pjesëmarrëse.

Ndryshe, Samiti për Demokraci është nismë e Shtëpisë së Bardhë që ka për qëllim të nxjerrë në pah suksesin e demokracisë në dobi të qytetarëve si dhe adresimin e sfidave më të vështira botërore.

Më 9 dhjetor 2021, Presidentja Vjosa Osmani përfaqësoi Kosovën në edicionin e parë të Samitit për Demokraci, platformë që ka bashkuar vendet nga e gjithë bota, në përpjekjet e tyre për të konsoliduar vlerat demokratike dhe për t’i promovuar e fuqizuar tutje ato.