Presidenti Trump: Procedura për shkarkim, mashtrimi më i madh në histori

Presidenti i Shteteve të Bashkuara, Donald Trump e ka quajtur procedurën për shkarkimin e tij, të nisur nga demokratët, si mashtrimin më të madh në historinë e politikës amerikane, rapoton RFE.

Video-mesazhi i publikuar nga Presidenti Trump në rrjetet sociale, vjen si kundërpërgjigje pas nisjes së hetimeve ndaj tij lidhur me dyshimet se ai, përmes bllokimit të ndihmës ushtarake për Ukrainën, i ka bërë presion Kievit zyrtar, që të hetojë kundërshtarin e tij politik, ish-nënpresidentin amerikan, Joe Biden.

Presidenti Trump tha se demokratët – të cilët javën e kaluar nisën procedurat për shkarkimin e presidentit – duan të marrin gjithçka:

“Duan të marrin armët tuaja, lirinë tuaj… dhe unë kurrë nuk do të lejoj që një gjë e tillë të ndodhë!”

They are trying to stop ME, because I am fighting for YOU! pic.twitter.com/xiw4jtjkNl

— Donald J. Trump (@realDonaldTrump) September 28, 2019

Në thelb të këtij, siç pretendohet skandali, është publikimi i raporti i një informatori, i cili ka treguar detaje për telefonatën e 25 korrikut ndërmjet presidentit amerikan, Donald Trump dhe homologut të tij ukrainas, Volodymyr Zelenskiy.

Gjatë kësaj bisede, Trump i ka kërkuar ndihmë Zelenskiyt për të hetuar Bidenin – i cili është kandidat demokrat për zgjedhjet presidenciale të vitit 2020 – dhe djalin e tij Hunter, i cili ka qenë anëtar i bordit të një kompanie të energjisë në Ukrainë.

Por, Presidenti Trump, ndihmën ushtarake për Kievin në vlerë prej 400 milionë dollarësh, për të cilën akuzohet, e kishte bllokuar para kësaj bisede telefonike.

Shtëpia e Bardhë, më 25 shtator, publikoi një transkript prej pesë faqesh të bisedës telefonike Trump-Zelenskiy.