Presidentja e Kosovës: Bandat kriminale në veri duhet të dënohen nga të gjithë

Presidentja e Kosovës, Vjosa Osmani, tha se bandat kriminale serbe në veri të mbështetura nga Presidenti i Serbisë, Aleksandar Vuçiç, kanë për qëllim destabilizimin e Kosovës dhe të gjithë rajonit, prandaj veprimet e tyre të rrezikshme duhet të dënohen nga të gjithë.

Duke dënuar edhe një herë sulmet e strukturave ilegale serbe kundër Policisë së Kosovës, KFOR-it dhe gazetarëve, Presidentja Osmani në takim me Zv/Sekretarin e Përgjithshëm për Paqe, Siguri dhe Mbrojtje në Shërbimin Evropian të Veprimit të Jashtëm, EEAS, Charles Fries, theksoi nevojën e koordinimit me partnerët ndërkombëtarë si hap i domosdoshëm në mënyrë që të sigurohet paqe dhe stabilitet afatgjatë në vend e rajon, ndërsa ka përmendur rëndësinë e sundimit të ligjit dhe përballjën me drejtësinë për bandat kriminale dhe veprimet e tyre të kundërligjshme.

Në këtë takim u diskutua për progresin e Kosovës drejt Bashkimit Evropian, me ç’rast Presidentja Vjosa Osmani ritheksoi përkushtimin e Republikës së Kosovës për integrimin euroatlantik. Ne veçanti, ajo informoi diplomatin Fries për progresin e bërë në fushën e sundimit të ligjit, që përfshinë edhe luftën kundër krimit të organizuar dhe korrupsionit si dhe për reformat demokratike dhe për përafrimin e plotë të politikës së jashtme dhe të sigurisë me atë të BE-së.

Ndërkaq Zv/Sekretari Fries vlerësoi lart bashkërendimin e Kosovës për dënimin publik dhe sanksionet kundër Rusisë si dhe përkrahjen e vazhdueshme ndaj Ukrainës.

Ndryshe, Zv/Sekretari i Përgjithshëm për Paqe, Siguri dhe Mbrojtje në Shërbimin Evropian të Veprimit të Jashtëm, EEAS, Charles Fries, në takim me Presidenten e Kosovës, Vjosa Osmani, ishte i shoqëruar nga shefi i Zyrës së BE-së në Kosovë, Tomas Szunyog dhe shefi i EULEX-it, Lars-Gunnar Wigemark.