Presidentja e Kosovës: Vepra e familjes Jashari, testament për fuqinë e shpirtit njerëzor
Vepra e familjes Jashari është testament për fuqinë e shpirtit njerëzor, tha Presidentja Vjosa Osmani në seancën solemne dedikuar 26-vjetorit të Epopesë së UÇK-së teksa dha mesazhin e unitetit për çështje kombëtare të Republikës së Kosovës.
“Republikës do t’i shërbejmë me devotshmëri, ashtu siç i shërbyen të gjithë të rënët. Vepra e Adem Jasharit dhe gjithë familjes është testament për fuqinë e shpirtit njerëzor, një kujtesë se edhe në orët tona më të errëta ne gjejmë forcë si popull për t’u ngritur mbi rrethana të rënda dhe për të luftuar për atë që besojmë,” tha Vjosa Osmani në seancën solemne duke vlerësuar se përballë familjes Jashari, Kosova meriton çdo ditë përkushtim të palëkundur.
“Përpjekja jonë e përbashkët në këtë proces nuk ka mbaruar. Tani më shumë se kurrë uniteti për çështjet e interesit kombëtar është i domosdoshëm sepse është mjeti i vetëm për ta forcuar shtetin tonë dhe për ta nderuar kujtimin e atyre që u sakrifikuan për Republikën tonë. Na takon neve ta shkruajmë kapitullin tonë të ri të historisë së shtetit tonë: atë të zhvillimit dhe afirmimit ndërkombëtar.”
Me këtë rast Presidentja Osmani e ka quajtur familjen Jashari si gardian të përhershëm të lirisë, ndërkaq pragun e shtëpisë së tyre si simbol të vet Kosovës.
“Marsi është muaji i skalitur në analet e luftës së kombit tonë për liri, një muaj kur shpirti i paepur i Adem Jasharit dhe Ushtrisë Çlirimtare të Kosovës i dha hov luftës kundër regjimit gjenocidal të Millosheviçit,” tha Presidentja e Kosovës, Vjosa Osmani, duke përfunduar:
“Prandaj ‘Sërish vjen marsi’ nuk është më veç një refren kënge, është moto e kujtesës dhe nderimit të luftës tonë për liri e pavarësi, e cila padyshim identifikohet me kryepersonazhin e luftës sonë, komandantin legjendar Adem Jasharin, familjen e tij dhe të gjithë Ushtrinë Çlirimtare të Kosovës.”
Konjufca: Prekazi – frymëzim për liri
Kryetari i Parlamentit, Glauk Konjufca, tha se familja Jashari ka dhënë mësimin se si rënia dhe liria së bashku shndërrohen në domosdoshmëri si sakrificë ndaj vendit.
“Gra e burra, pleq e fëmijë u sakrifikuan kolektivisht në luftë të drejtpërdrejtë për liri. Ata kolektivisht e zbatuan parimin ideal të jetës: liri a vdekje. Kur kombi arrin ta përcaktojë këtë princip, rënia bëhet liri, e liria bëhet domosdoshmëri,” tha Glauk Konjufca duke vlerësuar se Prekazi do të jetë përherë frymëzim për liri.
“Nuk e di kurrë se a janë fjalët të afta ta thonë krejt ngjarjen, nuk e dijmë kurrë se a mund ta kuptojmë përmasën e kësaj sakrifice. Druaj nëse mund t’i dalim hak ne të gjallët heroizmit të tyre, tha Kryetari i Parlamentit, Glauk Konjufca, duke përfunduar:
“Por një gjë të thjeshtë e di, aq sa është i sigurtë edhe gjaku i tyre: sa të ketë shqiptarë mbi dhe, secili do të vijë në Prekaz e do të frymëzohet aty ku u ngjiz liria.”
Kurti: Adem Jashari – emri i përveçëm me të cilin i referohemi lirisë
Kryeministri Albin Kurti ka thënë se Adem Jashari ka bashkëdyzuar lirinë e tij individuale me lirinë e popullit, duke u bërë emër i përveçëm në histori.
“Kosova është çliruar nga Serbia okupatore pikërisht nëpërmjet trashëgimisë politike që e prodhoi personalitetin dhe figurën e Adem Jasharit. Nga po kjo trashëgimi është ngritur dhe po ndërtohet e forcohet edhe shteti ynë. E kam fjalën për trashëgiminë e dalë nga kultura e rezistencës së armatosur dhe aktivizmit të kulluar politik, sidomos që nga Lidhja e Prizrenit e këtej, që i ka karakterizuar shqiptarët dhe veçanërisht Kosovën”, ka thënë ai.
Rrezistencën e familjes Jashari, Kurti e ka ndërlidhur si frymëzim nga kryengritësit që kundërshtuan pushtetin otoman në krye me Hasan Prishtinën, nga lëvizja e Azem Bejtës dhe Shaban Polluzhës dhe një vargë nismash të tjera historike për çlirim.
“Në këtë histori të çlirimit dhe shtetndërtimit, Adem Jashari dhe krejt çfarë përfaqëson figura e tij ka një hise të madhe. Në të vërtetë kjo është hisja më e madhe që mund ta ketë një njeri në historinë e vendit dhe kombit të tij. Ajo është hisja e një njeriu që brenda kohës dhe qenies së tij vepruese, lirinë e tij individuale e përbashkoi me lirinë e popullit të tij, gjatë gjithë jetës, deri në rënien heroike. Liria ishte kushti i jetës, e që u bë edhe kushti i vdekjes së Adem Jasharit. Nëse historia është përparimi i vetëdijes së popullit për liri, Adem Jashari është emri i përveçëm i njeriut me të cilën mund t’i referohemi lirisë sonë”, ka thënë Kurti.
