Marrëveshjet, APP: Institucionet të administrojnë sigurimin e kontratës dhe të ndjekin zbatimin

Marrëveshjet kuadër që institucionet mund të lidhin me operatorë të ndryshëm për të marrë shërbime ose produkte duhet të respektojnë rigorozisht rregullat.

Të paktën këtë ka theksuar Agjencia e Prokurimit Publik për autoritetet kontraktore që hyjnë në marrëveshje të tilla duke u kërkuar përmes një shkrese që të mbajë parasysh të gjithë hallkat që duhet të respektojnë.

Kjo ka të bëjë së pari që me specifikimet e para që bëhen në fillim të marrëveshjes mbi sasitë dhe periudhat e lëvrimit, por edhe me garancinë që ajo do të respektohet në afat. Për këtë APP ka nënvizuar në shkresë që një nga elementët e rëndësishëm që autoritetet kontraktore duhet të ekzekutojnë është administrimi i sigurimit të kontratës që sa 10 për qind e vlerës totale me TVSH.

“Sjellim në vëmendje që sigurimi i kontratës është garanci për autoritetet kontraktore të lidhura brenda marrëveshjes kuadër dhe administrohet për çdo kontratë të lidhur sipas marrëveshjes kuadër, pavarësisht vlerës së saj” thuhet në shkresë.

Ndërkohë APP thekson se institucionet duhet të kenë vëmendje mbi faktin që afati i zbatimit të kontratave të lidhura brenda marrëveshjes kuadër duhet të jetë në përputhje me afatet e zbatimit (lëvrimit) të përcaktuara në dokumentet e tenderit të marrëveshjes kuadër.

Gjithashtu termat dhe kushtet e kontratës duhet të hartohen me përgjegjësi dhe pa gabime si dhe në përputhje me dokumentet e tenderit dhe me ofertën fituese me qëllim shmangien e problematikave që mund të lindin gjatë zbatimit të kontratës.

Në rekomandim Agjencia e Prokurimit Publik u kërkon autoriteteve që siç përcakton korniza ligjore në rastet e marrëveshjeve kuadër, njësia që ndjek zbatimin e kontratës të caktohet menjëherë pas nënshkrimit të saj.

Kjo njësi harton planin e zbatimit dhe ndjek ecurinë e lëvrimit të mallrave që vijnë si efekt i kontratës, cilësinë e tyre sipas specifikimeve te bëra më herët dhe të dakordësuara gjatë procedurës si dhe afatet se kur janë lëvruar ato.

APP ka kërkuar që institucionet të plotësojnë dosjet sa i takon ndjekjes së kontratës me të gjithë dokumentacionin e nevojshëm ndërkohë që çdo kontratë duhet të përfundojë sipas afateve të rëna dakord. Shtyrje të saj sipas APP mund të ketë vetëm nëse ka pasur arsye madhore./Monitor/