Presidentja Osmani: Shprehja “bukë e krip e zemër” merr kuptim në Darkën e Lamës

Presidentja e Kosovës, Vjosa Osmani, e vlerësoi Darkën e Lamës si festën që i jep kuptim shprehjes shqiptare “bukë e kripë e zemër”, sepse në këtë sofër prodhuesit vendorë kanë vënë jo vetëm ushqimet tradicionale por edhe zemrat e tyre.

“Shekuj me radhë nën shenjën e dashurisë për njëri-tjetrin, respektin ndaj miqve, shqiptarët i kanë dhënë krah njëri-tjetrit në kultivimin e bereqetit dhe në mbledhjen tij, në darkën që është shtruar si shenjë falënderimi për të mira e mbledhura,” u shpreh Vjosa Osmani duke shtuar se Darka e Lamës është pjesë e një trashëgimie të pasur shpirtërore të cilën shqiptarët e kanë trashëguar dhe e kanë ruajtur që nga kohët e hershme.

“Sikur e dini presidenti Rugova gjithnjë festonte me miq, punonte me miq, dhe i falënderonte ata edhe për mirëqenin tonë. Ne do ta kultivojmë përherë këtë traditë të vyer të popullit shqiptarë, sepse vlerësojmë njësoj sikurse presidenti Rugova, se kultivimi i traditës së mirë e mbanë të gjallë shpirtin e një kombi.”

Presidentja e Kosovës, Vjosa Osmani, përmendi edhe pandeminë dhe falënderoi mjekët, mësuesit dhe të rinjët që sipas presidentes, punuan fortë e shkëlqyen në Kosovë e botë në fusha të ndryshme.