Pret Vitin e Ri në hotel me pesë yje, kapet në Itali shqiptari i shumëkërkuar

Një shqiptar 32-vjeç është deportuar nga shteti italian pasi rezultoi se ishte në kërkim për disa krime.

Mediat italiane raportojnë se arrestimi i tij u bë mëngjesin e djeshëm në një hotel me pesë yje në Forte dei Marmi, në të cilin kishte rezervuar për të kaluar festat e fundvitit.

Shqiptari A.A kishte paraqitur dokumenta false pranë recepsionit por ndryshimet e dukshme në foto nuk kishin bindur personelin të cilët kishin vënë në dijeni policinë.

32-vjeçari shqiptar, akuzohej për trafik dhe shpërndarje droge edhe më parë ishte dëbuar nga Italia. Por nëpërmjet dokumenteve fals, kishte gjetur mënyrën për të hyrë sërish në Itali, dhe me jetë luksoze prej turisti.

Nga hetimet e kryera  nga policia doli se gjeneralitetet në dokument nuk korrespondonin me ato të 32-vjeçarit. Marrja e gjurmëve të gishtërinjve më pas konstatoi se ai ishte në kërkim.

Forcat e rendit e shoqëruan në aeroportin e Fiumicinos, për ta kthyer në Shqipëri.

Ndryshe, pas dënimit  të parë që kishte marrë në moshën 19 vjeç për krime të rënda, rrëmbim me qëllim të zhvatjen e vazhdueshme, dëmtim personal, mbajtje armësh, më vonë ai kishte filluar veprimtarinë e tregtimit të drogës në disa qytete në veri të Italisë, ku u arrestua disa herë. Gjithashtu ai akuzohet për shkelje të shumta të masave të sigurisë “arrest shtëpie”  të miratuara ndër vite në ngarkim të tij.