Prodhuesit gjerman të birrës kërkojnë ndihmën e shtetit

Prodhuesit gjerman të birrës sot përmes një letre të hapur i kanë kërkuar ndihmë financiare qeverisë sepse kërcënohen nga falimentimi për shkak të rënies së madhe të kërkesës në kushtet e mbylljes së ekonomisë.

Në mbylljen e dytë, në muajin nëntor, Gjermania mbylli pubet, hotelet dhe restorantet, rikujton Agjencia e lajmeve Reuters.

Në letrën e hapur të shoqatës, e cila u firmos nga 300 prodhues të birrës, kërkohet ndihmë financiare nga qeveria në kuadër të programit të mbështetjes në koronakrizë kur u detyruan të hedhin sasi të mëdha të birrës që nuk e kanë shitur.

Qeveria ndihmoi pubet dhe baret, por jo dhe birraritë, thekson Reuters.

“Nga java në javë, gjithnjë e më shumë birrari, pube pronë e tyre dhe pika shumice, jo me fajin e tyre, po përballen me rrezikun nga falimentimi,” thuhet në letrën e hapur të shoqatave të prodhuesve të birrës, DBB dhe VPBD.

Letra, ndër të tjera është firmosur nga dega gjermane e birrarisë daneze Carlsberg, Bitburger Braugrupp, Krombacher dhe Paulaner Brauerei.

“Për shkak të mbylljes dhe kolapsit të tregut të birrës, birraritë në pjesën më të madhe ngelën pa bazën më të madhe financiare,” theksojnë prodhuesit e birrës duke shtuar:

“Sasitë e birrës që janë skaduar, me vlerë miliona euro, u hodhën!”

Gjithashtu, ata theksojnë se shitja e birrës me pakicë në dyqane nuk ishte e mjaftueshme që të kompensoj humbjen nga shitja në sektorin hotelier dhe eksporti.

Vitin e kaluar, birraritë kanë shitur rreth 8.7 miliardë hektolitër birrë, që është 5.5 për qind më pak se një vit më parë, konfirmojnë të dhënat e Drejtorisë gjermane të statistikave.

Shifrat nuk përfshijnë birrat pa alkool, dhe as birrat e importuara nga vendet jashtë Bashkimit Europian.

Dashuria gjermane për birra ka vite që ka pësuar rënie, por viti 2020 ishte veçanërisht i vështirë për prodhuesit e birrës, pasi që pandemia i ka mohuar shumë festivale dhe ngjarje ku janë konsumuar sasi të mëdha të birrës, duke përfshirë Oktoberfestin e njohur të Munchenit.