Projekti për Sazanin, Edi Rama: Është bërë aplikimi, do ta diskutojmë nëse përputhet me vizionin

Shqipëria është bërë një adresë gjithmonë edhe më e kërkuar jo vetëm për turistët, por edhe investitorët e huaj, deklaroi kryeministri Edi Rama, pas mbledhjes me drejtuesit e PS, teksa u pyet në lidhje me projektin turistik për Sazanin.

Edi Rama shtoi se transformimi i Sazanit në një xhevahir të kurorës së artë të turizmit mesdhetar është një ambicie e kahershme.

“Objektivi ynë është që Shqipëria të ngjitet në atë majë pa mundësi kthimi pas. Transformimi i Sazanit në një xhevahir të kurorës së artë të turizmit mesdhetar është ambicie e kahershme. E kanë pasur dhe qeveritë dhe paraardhësit e mi, nuk është bërë ende realitet.

Sot, Shqipëria është bërë adresë gjithmonë edhe më e kërkuar jo vetëm nga turistët, por edhe nga investitorët. Ne jemi absolutisht të kënaqur që kemi një propozim, i cili ende nuk është në procesin e domosdoshëm ku duhet të kalojnë disa shkallë. Është bërë një aplikim sipas ligjeve në fuqi në agjencinë tonë të investimeve të huaja, AIDA.

Do ta diskutojmë dhe nëse projekti përputhet me vizionin tonë dhe me domosdoshmërinë e krijimit të ekuilibrit mes zhvillimit dhe mbrojtjes së natyrës, duke e kthyer natyrën në asetin kryesorë të atij zhvillimi, atëherë do ecim përpara.”

Ndryshe, “Bloomberg” ka raportuar se kompania amerikane “Affinity Partners”, që zotërohet nga Jared Kushner, dhëndri i ish-presidentit të SHBA-së, Donald Trump, është në diskutime të avancuara për tre investime në zhvillimin e pronave në Ballkan që mund të kalojnë vlerën e 1 miliard dollarëve.

Firma e kapitalit privat me bazë në Majami planifikon ta transformojë ishullin e Sazanit të Shqipërisë në Mesdhe, që më parë ishte një bazë ushtarake, në një komunitet luksoz eko-resort të markës “Aman”, tha Kushner në një intervistë për “Bloomberg News”./Monitor/