Protesta e PD, policia në gadishmëri nga mbrëmja e sotme/ Zbardhet plani i masave…

Policia e Shtetit do të kalojë në gadishmëri nnga mbrëmja e sotme në kuadër të planit të masave për protestën e opozitës, e cila do të zhvillohet në bulevardin “Dëshmorët e Kombit”, para godinës së Kryeministrisë.

Referuar planit të masave, të angazhuar për mbarëvajtjen e protestës do të jenë 1500 efektivë policie, ndërsa forcat e Ndërhyrjes së Shpejtë dhe ato të RENEA do të jenë të stacionuara në godinat për rreth zonës ku do të mbahet protesta.

Opozita ka dorëzuar në Policinë e Tiranës kërkesën për zhvillimin e protestës së të shtunës. Protesta është parashikuar të nisë në orën 11:00, ndërsa në kërkesë nuk përcaktohet një orar për mbylljen.

Kryetari i PD-së, Lulzim Basha, ka postuar në “Facebook” spotin që fton qytetarët në protestë, më 26 maj në orën 11.00.

Drejtues të PD-së kanë deklaruar për zhvillimin e një proteste qytetare dhe paqësore, por nuk dihet se kur ajo mund të përfundojë. Ka ide që protesta të zgjasë për 72 orë, por Sekretari i Përgjithshëm i PD-së, Arben Ristani, deklaroi përfundimin e saj brenda ditës së shtunë.

Kryeministri Edi Rama pritet të jetë në Qarkun e Beratit gjatë zhvillimit të protestës.