Protesta zmbraps Qeverinë, rruga për Rinas rikthehet me dy korsi, penalizohet vetëm Veriu
Pas protestave të banorëve të zonës, Ministrja e Infrastrukturës dhe Energjetikes, Belinda Balluku ka inspektuar rrugën e Rinasit duke bërë të ditur se qarkullimi i automjeteve do të kthehet me dy sense lëvizjeje.
Dhe, siç e do zakoni me qeverinë e Edi Ramës, edhe në këtë zgjidhje të problemit që krijoi vetë Autoriteti Rrugor Shqiptar, të penalizuar ngelën vetëm banorët që vijnë nga Veriu
“Kemi fluksin e trafikut nga kthesa e Kasharit. Vjen deri në korsinë e daljes, 200 metra e gjatë. Bashkohet me rrugën ekzistuese dhe vazhdon fluksin e lëvizjes vetëm me një drejtim. Pjesa e trafikut që nuk shkon në aeroport por shkon drejt Ahmetaqit apo veriut vazhdon rrugën në këtë korsi dhe del te rrethrrotullimi drejt Vorës. Kushdo që vjen nga rruga e re që do të ndërtohet vjen në daljen afër kullës kontrollit merr djathtas dhe del para parkingut të aeroportit. Kemi nisur dje procedurën për të miratuar zgjidhjen e re. Do fillojmë procedurat dhe brenda korrikut kemi të përfunduar aksesin e ri nga rruga Kthesa e Kasharit-Ahmetaq drejt aeroportit,” tha Drejtori i ARRSH ndërsa ministrja Balluku theksoi se është bërë një studim nga i cili rezultoi se çdo qytetar që udhëton shoqërohet nga 2.5 persona të tjerë ndërsa të dhënat e Aeroportit flasin se në Rinas ngrihen 104 avionë në ditë, duke mos harruar dhe Universitetin Epoka ku parkojnë rreth 500 makina në ditë.
“Kjo rrugë është në shfrytëzim për Aeroportin e Rinasit. Këtu, udhëtarët humbën avionët e tyre dhe patëm ankesa. Edhe ankesat nga komuniteti janë të kuptueshme. Detyra jonë është që të akomodojmë shqetësimet e banorëve të zonës, por edhe pasagjerëve. Ndërkohë ajo që kërkojmë nga drejtuesit e automjeteve është që të përdorin dy akseset e tjera. Mos e frekuentoni rrugën e Rinasit, që sot rikthehet me dy korsi. Automjetet që i drejtohen Veriut duhet të përdorin rrugën te kthesa e Kamzës dhe Vorën. Edhe njëherë theksoj që gjithçka zgjidhet nëse ka bashkëpunim. Ata që i drejtohen Veriut të përdorin kthesën e Kamzës dhe Vorën. Përdorni dy daljet e tjera, atë që del në drejtim të Kamzës dhe atë që aksesohet nga ura e Vorës.”
Kështu, kjo është hera e dytë që Edi Rama penalizon vetëm Veriun! Për vështirësitë në financimin e mirëmbajtjes së rrugëve, të vetmen rrugë me pagesë Rama e bëri atë në Veri, Rrugën e Kombit, dhe për vështirësitë në rrugën e Rinasit ai ndalon qarkullimin për banorët nga Veriu si të vetmit pagues të lëvzijes mbi asfaltin që e administron Qeveria Rama.
