Protestë më 20 Shkurt! Pse është i shqetësuar Edi Rama?!
O sot, o kurrë, të bashkohemi dhe më 20 shkurt t’i japim tiranit atë që meriton! Ky kumt i Kryetarit të Partisë Demokratike, Sali Berisha, nga arresti i shtëpisë, ku e ka degdis Kryeministri Edi Rama, ndërsa i bënë thirrje të gjithë fermerëve të Shqipërisë ti mbushin rrugët e Tiranës me të gjitha mjetet bujqësore, dhe t’i japin tiranisë së hajnave atë që meritojnë, çuditërisht ka shqetësuar kupolën socialiste e cila për gjatë 24 orëve trumbeton përmes mediave që ka në shërbim, se nuk zgjidhen hallet e opozitës me protestë!
Dhe, sot, 10 ditë para përvjetorit të rënies së bustit të diktatorit Enver Hoxha, këto media që për asnjë ditë nuk i shërbyen të mirës publike, filluan telenovelën se si protestat politike nuk kanë më kuptim sepse nuk ndryshojnë asgjë, dhe, përjashtim bëjnë vetëm ato qytetare!
Ky llum mediatik që nuk mbështeti asnjë protestë qytetare, madje as në pikun e kanabizimit të Shqipërisë, ky llum mediatik që nuk mori guximin të thotë qoftë edhe një fjalë për skenarin e organizimit të protestave kundër armëve kimike dhe Amerika nga Edi Rama, ky llum mediatik që kishte frikë të mbështes fermerët e Lushnjes dhe ata të Korçës kur u ngritën në protestë nga falimentimi që po i bënë Ballkani i Hapur, në momentin që lideri i opozitës bënë thirrje nga arresti i shtëpisë për një protestë, ngriten si me pult dhe akuzojnë opozitën, që sipas tyre ka mbaruar, pse organizon protesta kur ato nuk sjellin asgjë!
Po kur ditë më parë në Berlin u ngritën partitë e majta gjermane kundër partisë së djathtë ekstreme AfD që vazhdon të rritet dhe mendohet si rrezik i kësaj të majte në Gjermani, askush nga ky llum mediatik i Edi Ramës nuk tha se 1.4 milionë gjermanë u mblodhën kot sepse rritjen e AfD nuk e ndalojnë protestat, ashtu si mendësinë e shumicës gjermane kundër emigrantëve sepse kanë lëkundur themelet e ekonomisë!
Ose, protestat e fermerëve në qendrat më të mëdha evropiane, ku kërkojnë subvencione për karburantet meqë iu reduktuan, kundërshtimin e importit të mallrave me çmim më të lirë dhe taksat e çuditshme nga e majta për ruajtjen e ambientit!
Në Gjermani u hap debati për AfD-në ndonëse nuk u konsiderua si protestë ku gjermanët ishin shqetësuar për dëbimin e emigrantëve për të cilën vazhdon dhe trumbeton kjo parti e ekstremit të djathtë, edhe pse socialistët gjermanë u munduan ta fajësojnë për dëbim edhe të atyre emigrantëve që kanë marrë nënshtetësinë!
Gjithashtu, vetëm pas protestave të fermerëve u nxit debati në Parlamentin Evropian dhe reagoi Komisioni Evropian, ndryshe nuk kishte dëgjuar njeri para këtyre protestave nga PPE dhe partitë tjera të djathta, të fajësojnë politikat e majta për gjendjen e fermerëve në Bashkimin Evropian.
“Politika bujqësore nuk është nënndarje e politikës ekologjike, por është temë e rëndësishme e veçantë,” tha në seancën plenare lideri i PPE, Manfred Weber.
Weber duke shtuar se PPE ishte kundër urdhrit që të ripërtrihet natyra, e cila u miratua në muajin nëntor, dhe parashikon masa për ripërtrirjen e të paktën 20 për qind zonave detare dhe tokësore që janë në gjendje të keqe deri në vitin 2030 dhe gjithë ekosistemit deri në vitin 2050.
“Gabim është të lihet toka djerrë kur mungon ushqimi,” tha Weber.
Fermerët në Lushnje u ankuan për çmimin e grumbullimit të qumështit i cili nga 18 lekë ra në 12 lekë si pasojë e Ballkanit të Hapur dhe furnizimit të fabrikave të përpunimit të qumështit nga Serbia, por ky llum mediatik nuk është se iu bashkua këtij shqetësimit qytetar.
Por, protestat e fermerëve evropianë ndonëse shumë më joetike nga ato që mediat në shërbim të Edi Ramës i kritikonin protestat e PD, ose joqytetare me standardet e Lali Erit, folën përmes protestave të politikës në Parlamentin Evropian.
Partitë shumë më të djathta se PPE, konservatorët dhe reformatorët evropianë – ECR, si dhe Identiteti dhe demokracia – ID, fajësuan Planin e Gjelbër, strategjinë e BE për arritjen e neutralitetit klimatik deri në vitin 2050, për problemet e fermerëve.
“Po promovoni të ushqyerit me insekte, ndërsa i keni shpallur luftë verës dhe bagëtisë,” tha Eurodeputeti italiane nga ECR, Nicola Procaccini, duke shtuar se në kuadër të planit të çmendur të gjelbërve po bëhet luftë kundër prodhimit bujqësor, ndërsa eurodeputeti estonez nga ID, Jaak Madison,e tha një fakt të padëgjuar më parë para protestave.
“Me utopi dhe fantazi nuk do ta shpëtoni planetin. Vetëm 6 për qind të CO2 emeton Europa, e këtë ngarkesë dëshironi t’ia ngarkoni fshatarëve!”
Vetëm pas protestave të mëdha të fermerëve që goditën Francën, Belgjikën, Gjermaninë, Holandën, Rumaninë dhe Italinë, Presidentja e Komisionit Evropian, Ursula Von der Leyen, u detyrua të shpall tërheqjen e urdhrit për përdorimin e qëndrueshëm të pesticideve që ishte dhe shkëndija e cila ndezi protestat; Ndryshe nga fermerët e Korçës dhe Lushnjes që zgjohen dhe bien në gjumë me shumë halle, jo vetëm se çfarë do të bëjnë me mijëra tonë mollë stok ose mijëra litra qumësht, që më llogari kanë t’i derdhin në lumë se sa t’i çojnë në pikën e grumbullimit, por, dhe faktin se as politika nuk mund të flas në Parlament, aty ku vetëm Edi Rama është vetë shkop e vetë Zot!
20 Shkurti
Çfarë mund të zgjidhë 20 Shkurti! Asnjë opozitar nuk ëndërron që me 20 shkurt, në rast të protestave masive, do të ndërgjegjësohet Kryeministri Edi Rama dhe do të filloj ta trajtoj mirë opozitën dhe institucionet që ka shpërfytyruar!
Asnjë fermerë nuk ëndërron që me 21 shkurt do të realizohen ato që lideri i opozitës i premtoi duke filluar nga barazia e taksave, TVSH e inputeve, nafta, subvencioni për prodhimet etj.
Por, rrugët e Tiranës, më 20 Shkurt do të mbushen në shenjë proteste për trajtimin që Edi Rama po u bënë shqiptarëve pavarësisht se Sali Berishën e bëri non grata, pavarësisht se e vuri Saliun nën arrest, pavarësisht se Saliut i mohoi vulën e PD, dhe pavarësisht se këtë lloj diktature po e mbështesin dhe promovojnë mediat dhe Ambasadorët që Edi Rama i ka në shërbim!
Thjeshtë, Edi Rama nuk po ndalet!
Gjithashtu, askush nuk e përjashton mundësinë që protesta nuk do të jetë masive si ajo e 20 shkurtit 1991 kur u rrëzua busti i diktatorit Enver Hoxha, por, sido që ta konsideron ky llum mediatik këtë lloj proteste, politike ose qytetare, protestuesit e kësaj dite janë të sigurt se nuk ka “neritan cekë” që mund ta devijoi qëllimin e tyre, sot, kur ujin, ajrin dhe tokën shqiptare e ka shit Edi Rama!
Ky është dhe shqetësimi kryesor i Edi Ramës, sepse vetëm ai e dinë se si i nxori nxënësit për ti thënë jo armëve kimike dhe Amerikës, si i organizoi protestat e studentëve për reformën në arsim, pse munguan protesta të atyre përmasave për reformën në drejtësi e cila tashmë ka falimentuar, dhe, pse nuk bëhen fare protesta për refugjatët afrikanë në Shëngjin!
Dhe, në fund, jo vetëm Edi Rama e dinë, se:
Zullumi këtputet, kur trashet…
