Provokimet serbe në Plavë e Guci, LDMZ: Skenar i Kishës Ortodokse Serbe!
Kemi përcjellur me vëmendje dhe me shqetësim të madh provokimet e rradhës që Kisha Ortodokse Serbe po i bën shqiptarëve autokton të Plavës e Gucisë, me saktë fshatit Martinaj, të banuar me popullsi 100% shqiptare, me projeksionet e Kishës Ortodokse të Serbisë, thekson në reagimin e saj Lidhja Demokratike në Mal të Zi, LDMZ, pas incidenteve të fundit në Martinaj të Gucisë, duke konstatuar:
“Ky skenar duket mirë i përgatitur, me vendosjen e një kutije të metalit në majen e Rumisë dhe njëherit ngjan si akti i rradhës, pas atij të Shasit.”
Asnjëherë nuk kemi qenë e as nuk jemi kundër objekteve fetare, përkundrazi, shqiptarët janë shembull në Ballkan e më gjërë për tolerancën e bashkëjetesën fetare, thekson Lidhja Demokratike në Mal të Zi, mirëpo kjo Kishë është gjithçka tjetër, përveç se fetare.
“Është provokim i hapur para syve të shtetit dhe të botës, është tentativë për uzurpim të pronës private, ndërtimin e Kishës në kundërshtim të hapur me ligjet egzistuese (pa plane urbanistike dhe pa leje ndërtimi, kur dihet se një e tillë iu është refuzuar) dhe si e tillë është e papranueshme për shqiptarët në Malin e Zi,” thekson LDMZ duke kërkuar nga organet kompetente ndërprejen e menjëhershme të veprimeve të Kishës Ortodokse Serbe në pronat private dhe në trojet autoktone shqiptare:
“Të indinjuar thellë me mungesën e shtetit, i pafuqishëm ose bashkëautor, si çdoherë ndaj veprimeve të Kishës Ortodokse Serbe, e poashtu me mungesën e reagimit te instancave politike të popujve pakicë si Këshillit Kombëtar të Shqiptarëve, Ministrisë për të drejtat e njeriut dhe pakicave, kërkojmë nga organet kompetente shtetërore, ndërprejen e menjëhershme të veprimeve të Kishës Ortodokse (famekeqe) Serbe në pronat private dhe në trojet autoktone te kësaj treve e më gjërë,”thekson thellësisht e shqetësuar për situatën e krijuar Lidhja Demokratike në Mal të Zi, duke përfunduar:
“Njëherit me këtë reagim njoftojmë të gjitha diplomacitë ndërkombëtare të akredituara në Mal të Zi me situatën e krijuar dhe me shovinizmin modern të pashoq që po ushtrohet ndaj popullatës në Plave e Guci vetëm se janë shqiptarë dhe autokton.”
