Pse Miroslav Lajçak po shkel nëpër mina!
I dërguari i BE për dialogun Kosovë-Serbi pas një dështimi total në lehtësimin e e arritjes së një marrëveshje, kur veriu po gëlon me kriminelë serbë dhe Josep Borrel po kërkon nga Albin Kurti ta shtensionojë situatën duke i lënë të qetë, Miroslav Lajçak na thotë se në rrugëtimin e tij ka shumë mina që nuk duhet ti shkel. Po kush i vendosi këto mina?!
nga Agim Popoci
Janë mbi 100 shqiptarë që jetojnë në brezin kufitar Shqipëri-Kosovë, që pasi kanë rënë në minat serbe kanë mbetur invalidë të përjetshëm. Në fillim ishin ca shoqata humanitare që i ndihmuan me ca pajisje për t’ju lehtësuar jetën, por nuk u mor më njeri me ta përveç se mbetën pjesë e statistikës së OKB si njerëz që kanë rënë në minat antikëmbësorike serbe!
Presidentët dhe Kryeministrat e Kosovës, që nga dita e parë që janë ulur në fronin e drejtimit të shtetit, nuk e kanë çarë kokën për këta njerëz që gjithsesi janë hall shqiptarë, edhe pse ranë në këto mina serbe për arsye të ndryshme duke qenë sot edhe të ndërgjegjshëm pse nuk iu shtri dora nga dy shtetet shqiptare!
Dhe, sot, ju vjen dita, që të dyja këto shtete, të detyrohen ta ndihmojnë njeriun i cili nuk e njehë fare shtetin e Kosovës, vjen si i dërguar i BE për dialogun Kosovë-Serbi me mbështetjen pa rezervë të Këshillit Evropian, vetëm pse thotë se rruga nëpër të cilën ai po shkel është e minuar dhe ka shkelur në një minë!
Por, kë quan Miroslav Lajçak minë të cilën e ka shkelur?!
Mina ka emër!
I dërguari i BE për dialogun Kosovë-Serbi, thotë se zgjedhjet lokale ishin mina që për fat të keq i kanë shkelur, dhe çuditërisht pas shumë viteve dështim ai, sot, thotë se BE e dinë saktësisht se çfarë duhet bërë! Dhe, gjithçka çfarë bëri deri më sot është sanksionimi i Kosovës për këtë vendosje të minave nga Beogradi!
Ndonëse shteti kriminal serb që nga dita e parë e shpërthimit të konfliktit në Jugosllavi në fillimvitet ’90, filloi ta mbush me mina gjithë territorin që e konsideronte të paarritshëm për shtetin e ri që filloi ta krijoi, mina që shkaktuan shumë viktima si në Slloveni, Kroaci, Bosnje, Shqipëri dhe Kosovë, sot, pas 30 viteve ne dëgjojmë nga i dërguari i BE për dialogun Kosovë-Serbi se rruga dialoguese nëpër të cilën ai po shkel për ta lehtësuar, ku palë është dhe Beogradi zyrtar, na paska mina!
Para se ta artikulonte i dërguari Borrellit, këtë e kanë thënë të gjithë shqiptarët e përfshirë në dialogun me Serbinë, ashtu siç i kanë bërë të qartë edhe për Marrëveshjen e marsit që nuk është kurrfarë momenti historik kur Vuçiç e priti me minë në dorë, ndonëse Miroslav Lajçak vazhdon ta konsideroj një moment historik në normalizimin e marrëdhënieve ndërmjet Serbisë dhe Kosovës.
Se kur do ta kuptoj BE dhe i dërguari i saj për këtë dialog që zvarritet pa lidhje, nuk dihet, por zgjedhjet lokale ishin një minë me sahat të cilën e vendosi në sy të botës vetë Presidenti i Serbisë, Aleksandar Vuçiç, dhe nuk ka lidhje as me Kosovën dhe as me Kryeministrin e saj, Albin Kurti, pavarësisht se çfarë broçkullis opozita kosovare dhe fërkon duart për pushtet pse dialogu po dështon!
Sikur shtetasve shqiptarë ashtu dhe ushtarit hungarez të KFOR-it që pësoi në protestat e kriminelëve serbë në veri, nuk ka njeri në këtë tokë që mund t’ju kthej gjymtyrët, por, fajtori është një dhe i vetëm pavarësisht dialogut shqiptaro-serb, Serbia!
Gjithashtu, zgjedhjet në veri, nuk ka njeri në këtë tokë të thotë se i plotësojnë standardet ndërkombëtare nëse në këto zgjedhje nuk marrin pjesë serbët lokalë që aktualisht janë shumicë, dhe për pjesëmarrjen ose mospjesëmarrjen e tyre fatkeqësisht, sërish, fajtor është një dhe i vetëm, Serbia!
Mina serbe kudo
Nëse i dërguari i BE për dialogun Kosovë-Serbi, Miroslav Lajçak, e dinë se çfarë duhet bërë ndërsa vazhdon ta lejoj Serbinë të vendos mina përgjatë rrugës nëpër të cilën po ec, të gjithë duhet ta ketë të qartë si ai ashtu dhe shefi i tij Borrell, se kjo rrugë përplot me “mina tokësore” nuk çminohet duke e sanksionuar Kosovën!
Për ta kuptuar problemin e madh të një toke të minuar ku duhet të shkelë, Miroslav Lajçak duhet ta sakrifikoj një udhëtim drejt Bratislavës dhe ti drejtohet Republikës Srpska ku mbi 200 kilometra katror janë të minuara, për të kuptuar se populli kriminal serbë minon edhe vendin ku jeton vetë!
Në rast se edhe pas kësaj vizite mbetet i pasqaruar, mund të takoj togat pafund të çminimit të Forcave të Armatosura të Shqipërisë në kuadër të NATO-s në Bosnje Hercegovinë, që janë përballur me serbët që i kanë thirr pasi kanë hasur në mina në ambientet ku jetojnë!
Si dëshmitar okular gjatë realizimit të një dokumentari, rastisa të jem pjesë e një operacioni të çminimit në një stallë të një fshati afër Sarajevës; Pas largimit të dy minave, fshatari serb sapo mori vesh se bëhet fjalë për ushtri shqiptare u gjindos më keq se Lajçak që ka ra në minën serbe të zgjedhjeve në veri të Kosovës!
-Pse reagon kështu, -e pyeta!
-Ku kemi arritë,- më tha, më mirë të më kishte goditë rrufeja, se sa që më shpëton jetën time dhe lopës që kam në stallë, një shqiptar!
-Nga je,- më pyeti, ndërsa unë i mpirë nga ky përjetim serb vazhdova duke dalë nga avllia e tij ku për momentin më dolën ca fjalë:
-Mitrovica…isha, nga Mitrovica e Kosovës, por më dëbuan serbët, – duke rrëfyer po e shikoja në sy serbin 76 vjeçar me stallën tashmë pa mina që kishte dhe privilegjin të mpihet, dhe, sikur po mundohej të më thoshte diçka; Ndërsa unë po largohesha pa fjalë duke menduar se mos isha unë fajtori, që i shpjegova atij fshatari serb se i cilit shtet ishte flamuri që mbanin në krah ushtarët e togës shqiptare të çminimit!
Ashtu siç jam sot pa fjalë, Unë dhe jo vetëm, kur dëgjoj Përfaqësuesin e Lartë për Politikë të Jashtme dhe Siguri pranë Bashkimit Evropian, Josep Borrell, që Albin Kurti është fajtor pse po zbaton ligjin në Kosovë; Dhe, opozitën kosovare, që akuzon Albin Kurti që tensionon situatën duke u përballur me krimin serb në veri!
Dhe, në momentin kur pikën mbi “i” vuri i dërguari i BE për dialogun Kosovë-Serbi, Miroslav Lajçak, duke theksuar për të përditshmen austriake “Kurier” se e dinë saktësisht se çfarë duhet bërë, por, ka shumë “mina tokësore” përgjatë kësaj rruge që nuk duhet t’i shkel.
As mos i shkel, as mos e çmino tokën e Kosovës, kështu e duan serbët! Ndoshta ky është dhe misioni yt, Miroslav Lajçak, mision të cilin deri më sot vetëm opozita në Kosovë nuk e kuptuar!
Në fund, mos e kërko as arsyen pse Presidentit të Serbisë, Aleksandar Vuçiç i duhet kontrolli i kufirit me Serbinë, dhe jo Asociacioni për të cilin po bënë luftën! Sot, kur Kryeministër i Kosovës është Albin Kurti, dhe korrupsioni në dogana është në vlera minimale, dhe Kryeministri i Maqedonisë së Veriut, Dimitar Kovaçevski, në Forumin e Prespës, e tha më mirë se kushdo tjetër duke avancuar më shumë se homologët e tij që mburren kot, si Edi Rama që thotë se ka hapur kufijtë me Ballkanin e Hapur por tashmë ai ka kryer misionin, ashtu dhe noterja e Vuçiçit, Ana Brnabiç, që shton në krah të Ramës se nuk besojon se Kryeministri Rama është kundër iniciativës Ballkani i Hapur!
“Kufijtë që ekzistojnë aktualisht, mes vendeve që kanë regjim pa taksa me njëri-tjetrin, janë vetëm burim korrupsioni dhe asgjë tjetër!”/Revista Shenja/
