Pse Sahatin e Tiranës filloi ta ngref Blushi!
Ka kohë që strategët mediatik të Edi Ramës kanë filluar me helmimin e opinionit publik mbi domosdoshmërinë e zhvendosjes së Sahatit të Tiranës, meqë është mbuluar nga kullat që u ndërtuan përreth!
Këtë helmim së fundi e hodhi në letër bashkërrufitësi i kafesë me Kryeministrin në Taiwanin e Besos, dhe bashkëluftëtari i tij nga fronti i ’97-së, Ben Blushi!
Pasi bënë përshkrimin e historisë së Tiranës dhe ndërtimit të Kullës së Sahatit, duke kaluar elementin thelbësor të zhvillimit të kryeqytetit, periudhën e administrimit nga jokomunistët, ai bënë një kapërcim duke ardh në javën e tretë të Tetorit 2022, ku gjithçka që të shikon syri në Tiranë, gjithë ky shkatërrim ka vetëm një fajtor që vetëm Ben Blushi nuk e sheh, Edi Rama!
“Më shumë se si orë, tani Sahati duket si një laps i rrasur pa kujdes në mes të një ipad betoni që është kulla nga pas,” thotë miku i Edi Ramës duke sqaruar se sahati nuk shërben më si një orë sepse ne të gjithë kemi nga një orë në dorë ose në celular dhe nuk kemi nevojë të ngremë kokën për të parë akrepat e tij të ngathët.
Së pari, Sahati i Tiranës nuk është rrasur pa kujdes në mes të betonit, por e ka rrasur Edi Rama ose më saktë Lali Eri me urdhër të Ramës, dhe nëse ky njeri do ta nxjerrë Sahatin nga bataku i turpit mund të sjellë ata ustallarët e tritolit që i lujtën fenë Vlorës me pallate e biznese për të dëshmuar pushtetshmërinë që ka!
Së dyti, për të kuptuar rëndësinë e Sahatit të Tiranës, Ben Blushi kthehet 200 vjet përpara dhe gjen fajtorin në Krujë edhe pse pa nevojë!
Ben Blushi flet për vitet 1800 me gjithë toponimet komuniste, Komuna e Parisit, Fresku dhe Lapraka, të cilën e mbush me ferra, nga ku herë pas here, thotë ai, vinin Toptanasit që donin tua merrnin Tiranën Bargjinëve, apo Bushatllinjtë e Shkodrës të cilët gjithmonë mbronin Bargjjnët kundër Toptanasve. Nëse nuk do ishte për Bushatllinjtë,Tirana do ishte pushtuar nga Kruja shumë më herët dhe ndoshta do ishte një qytet edhe më i prapambetur se ç’e njohim, thotë miku i Ramës nga fronti i ’97-së, ndërsa flet për përleshjen e këtyre dy fiseve, Bargjinëve dhe Toptanasve për Tiranën, shumë pusi, vrasje e gjak dhe po aq krushqi, dhe nëse kjo përleshje nuk do kishte ndodhur konstaton helmuesi rilindas i opinionit publik, qyteti i Tiranës mund të ishte ndërtuar më shpejt dhe ndoshta do ishte bërë kryeqytet edhe më shpejt.
Por, Lapraka ishte e tillë edhe në fund të viteve 1900, kur erdhi kryetar i bashkisë Tiranë, Edi Rama, dhe nuk pyeti njeri, as histori, as traditë, as pronar, as zaptues, dhe po ato ferra i zëvendësoi me pallate!
Dhe, nuk ndërtoi asgjë që do ti vlente kryeqytetit sepse qytet e kishte bërë Mbreti Zog.
A mund të ishte më i prapambetur! Kjo nuk diskutohet sikur në fillimvitet vitet 1900 të vinin dorë komunistët, paraardhësit e Ben Blushit dhe Edi Ramës ata bolshevikët që i vunë bazat e tyre të besimit fetar.
Sahat Tirone, për zili të Krujës!
“Mos u bëj lugë për çdo gjellë,” thonë korçarët por Ben Blushi si i tillë ka marrë misionin ti gjejë zgjidhjen Sahatit të Tiranës fillimisht duke e kurdis ose siç thonë krutanët, ngref, dhe relativizuar betonin e hedhur përreth nga miku i tij Edi Rama! Dhe, sqaron arsyet pse u ndërtua ky Sahat pikërisht aty ku është sot, në mes të betejave të Krujës me Tiranën, në fund të viteve 1700 dhe fillimit të viteve 1800.
Blushi do të bindë shqiptarët sot se ai që e ndërtoi Sahatin e ka pasur për qëllim që kjo bina të dukej nga lartësitë e Krujës, dhe ti ngjallte zili e ti kompleksonte fshatarët e ashpër të Krujës!
Krutanët e kuptojnë hallin e Ben Blushit për të mbrojtur veprimet e Edi Ramës, por, nuk kuptojnë nga buron gjithë kjo urrejtje e tij për krutanët!
Duke ju përmbajtur parimit krutan, që, groshës hujë mos i hidh ujë, duhet sqaruar jo vetëm Benin që nuk ecën dot vetëm pa Ramën, se Kullë Sahati në atë kohë kishin të gjitha qytetet e njohura evropiane që ishin nën pushtetin e Perandorisë Osmane dhe nuk kishin Et’hem Mollë Beun; Dhe, sot e kanë po atë Kullë Sahati dhe e mirëmbajnë, jo se nuk kishin bushatllinjë, toptanas dhe krutanë përreth, por nuk i lenë njeri ti fut duart ndonjë Edi Rame në identitetin e qytetit!
Pse krutanët nuk e kishin dhe nuk e kanë zili Sahatin e Tiranës! Kruja ka Kullën e Sahatit që nga shekulli XII dhe Blushi nuk ka nga ta dijë sepse kur ky sahat binte dëgjohej shumë më afër se sa Korça, “vetëm” deri në Prezë; Aty ku nuk lindën dhe u rritën njerëz me dhunti plagjiature!
Sot, Ben Blushi është “i lumtur” që krutanët janë zbutur dhe kur vinë në Tiranë vishen me rrobat më të mira, sepse, sipas tij, në atë kohë, ata ishin si njerëz të egër dhe konsideroheshin banditë që vinin për të vjedhur dhe plaçkitur!
Por, kush i konsideronte banditë?! Miku i Edi Ramës edhe mund të mos kishte interes të lexonte ato që thonë Arkivat e Venedikut për arsyet e strehimit të Skënderbeut në Krujë dhe traditat e besnikërinë e njerëzve që jetonin në këto vise, meqë për male e kodra Shqipëria ishte e tëra, por është e qartë se gjykimin për egërsira e ka të injektuar nga edukata familjare e fetare që ka, e si protagonist i rëndësishëm i kryengritjes së vitit 1997 e kishte shumë të lehtë ta gjente konkluzionin e nivelit të civilizimit për krutanët.
“A të duhen gënjeshtarë, matrapaz e kokëktharë, rërën të ta shesin për farë, merr krutan dhe je i larë,” thoshte bolsheviku Fan Noli nga i cili buron dhe urrejtja e Ben Blushit, Edi Ramës dhe të ngjashmëve për krutanët, sepse edhe predikimet i kishte të këtij lloji ku shpërfillte dhe luftën e Skënderbeut! Por, kjo nuk i bënë banorët e Krujës të jenë të kujdesshëm dhe të vishen kur shkojnë në Tiranë, në këtë qytet zemërgjonë që i hapi dyert edhe gjithë kriminelëve të zonës së parë operative, me përfundimin e luftës së dytë botërore.
Krutanët janë ndryshe, ata nuk u edukuan nga bolshevikët dhe nuk kanë paragjykime për ata që nuk janë nga Kruja! Të rritur në një frymë familjare edhe me ikjen e Skënderbeut në amshim, nuk ishte Perandoria Osmane por Kanuni i Bendës ai që mbajti rregull në këtë zonë!
Më kot u munduan komunistët për gjysmë shekulli ta thyejnë traditën familjare krutane, ashtu si dhe Blushi me Ramën e të tijët në revolucionin komunistë të vitit 1997; Vërtetë arritën të gjejnë gjakpirës dhe ata që janë të gatshëm të vrasin për tre gishta kudo nëpër Shqipëri, por Krujës nuk i vunë dot flakën!
Të ruash vendlindjen tënde, për Blushin dhe Ramën edhe është egërsi, e kjo mjafton vetëm nëse i lëshon një sy Tiranës!
Pse sot Kruja vazhdon të ketë Kullën e Sahatit, Pazarin e Vjetër dhe pedonalen, për Blushin dhe Ramën vërtetë është egërsi, por ideja se me çorapet e kuqe të Edit dhe kollaret e cirkut mund ta zhbësh përçudnimin e Bulevardit, përdhosjen e Pazarit të Tiranës, e tashmë edhe zhvendosjen e Sahatit të Tiranës, vetëm me civilizimin nuk kanë lidhje!
Ti mbyllësh sytë pas 85 vjetësh, për punën 14 vjeçare të Ing.Eshref Frashërit të Tiranës, i cili edhe pse kishte Kullën e Sahatit aty ku është sot, arriti të bëjë një plan të kryeqytetit shqiptar që edhe sot i qëndron kohës sikur se me Bulevardin, Sheshin Skënderbe, Rrugën e Durrësit, zgjerimin e qytetit nga Varri Bamit dhe Stadiumin e Qytetit poshtë Stacionit të Trenit, është shumë më krim se sa krimi që bëri dora vetë Edi Rama, dhe sot ka hallin si ta ngref e ku ta degdis Sahatin e Tiranës.
Ngrefja e Sahatit të Tiranës
Nuk dihet se çfarë i pëshpëritë Edi Rama mikut të tij të frontit të ‘97-ës, Ben Blushi, ndërsa rrufisin kafen në Taiwanin e Besos, por nëse vërtetë i duhet ta zgjidhë problemin pse Sahati është sërish në qendër por nuk është më Qendra e qytetit, ky Sahat nuk ka pse të ngrefet dhe zhvendoset nga Blushi!
Sot vërtetë Sahati i Tiranës nuk shërben më si një orë sepse ne të gjithë kemi nga një orë në dorë ose në celular dhe nuk kemi nevojë të ngremë kokën për të parë akrepat e tij të ngathët, siç thotë Ben Blushi, por as kullat që janë ndërtuar mbi të nuk shërbejnë për të na treguar se jemi në Tiranë.
Po, Lali Erit i duhen për ti thënë shefit se ka zbatuar urdhërat dhe aty ku kishte tokë sot ka kullë, por Tirana ka dhe histori ashtu si qytetet tjera evropiane; Dhe, çdo qytet që ka një Kullë Sahati të këtij lloji, ndërtimet i ka rreth tij dhe jo mbi të!
Tironsit dhe jo vetëm, mund ta imagjinojnë për një çast, siç sugjeron Ben Blushi, sikur Sahati i Tiranës të zhvendoset 50 metra nga aty ku është për tu vendosur në mes të Sheshit Skënderbej.
Por, tironsit dhe jo vetëm, mund ta imagjinojnë për një çast pse ai nuk duhet të preket aty ku është dhe fatin që mund të ketë ky vend, sikur Edi Rama të zëvendësohet me Lali Erin! Ku do të përfundonte Sahati I Tiranës që ka filluar të ngrefet nga Ben Blushi?!
Në rastin më të mirë, Sahati i Tiranës mund të përfundoj në Krujë, për të hequr merakun e Ben Blushit për “zilinë krutane”, dhe në rastin më real kur komunistët sundojnë, aty ku përfundoj Bulevardi i Mbretit Zog, në harresë!
Arsyet janë të shumta, por kur Kryeministër ke Edi Ramën që vazhdon ta ketë për mik atë me të cilin e ideoi fitoren ndaj Saliut në vitin 1997, Ben Blushin, përgjigja është e gatshme sërish tek parimi krutan:
“Barrën e kalit mos ia ngarko gomarit!”
