Publikohet analiza gjenetike e koronavirusit. Ka një mister, kërkohet reagim urgjent
Analiza gjenetike e koronavirusit të ri 2019-nCoV ka treguar se fjala është për një patogjen të ri i cili dallon nga SARS dhe se duhet të konsiderohet si një koronavirus i ri njerëzor, me gjashtë të tjerë të njohur më parë.
Studimi i prezantuar në njërën prej revistave më prestigjioze, The Lancet, zbulon disa rezultate të papritura, ndër të cilët se 2019-nCoV gjenetikisht është më i ngjashëm me virus të tjerë që janë gjetur tek lakuriqi i natës se sa te SARS, dhe se pak kohë më parë është futur ndër njerëz.
Duhet zbuluar urgjentisht misterin e rëndësishëm – ndërmjetësin
Autorët, ndër të tjera, theksojnë se lakuriqi i natës nuk e ka infektuar drejtëpërdrejtë njeriun, por ndërmjetës është një tjetër kafshë e cila mendohet se është shitur në tregun e Wuhanit. Kjo, theksojnë ata, duhet të zbulohet sa më shpejtë, pra, për cilën kafshë është fjala, në mënyrë që të kuptohet më mirë evoluimi i mëtejmë, përshtatshmëria dhe përhapja e virusit.
Kjo do të lehtësonte dhe përshpejtonte zhvillimin e ilaçeve, trajtimin dhe vaksinat që eventualisht do të mund të shpëtonin miliona jetë njerëzore në gjithë botën. Zgjidhja e këtij misteri gjithashtu është i rëndësishëm edhe për parandalimin e kalimit të koronavirusit nga kafshët tek njerëzit.
Në këtë studim përmes fragmentarizimit të gjeneratës së re, NGS, është studiuar struktura gjenetike e virusit, pika e fillimit si dhe lidhja gjenetike me virus të ngjashëm.
Gjatë studimit janë analizuar 9 mostra që janë marrë nga të sëmurët tek të cilët është konfirmuar prezenca e virusit 2019-nCoV.
Çfarë i befasoi shkencëtarët?
Shkencëtarët u befasuan pasi që rezultatet konfirmuan se të gjitha fragmentet e studiuara në mes vete përputhen më shumë se 99.98%, gjë që sugjeron se virusi nuk ka shumë kohë që është infiltruar tek njerëzit dhe sipas të gjitha gjasave nga një lokacion.
“Është e jashtëzakonshme që fragmentet e 2019-nCoV nga pacientë të ndryshëm janë gati identike. Ky rezultat sugjeron se 2019-nCoV është krijuar nga një burim për një kohë shumë të shkurtë dhe është zbuluar shumë shpejtë. Mirëpo, deri sa virusi të transmetohet tek disa individ, duhet mbikëqyrja e vazhdueshme e mutacioneve që krijohen,” thotë njëri ndër autorët kryesor të studimit, profesor Weifeng Shi nga Laboratori për etiologji dhe epidemiologji për sëmundjet e reja infektive në Universitetin Shandong në Kinë. Rezultatet ndër të tjera tregojnë se gjenomi i virusit 2019-nCoV rreth 88% përputhet me dy koronavirus që transmetohen ndër lakuriq të natës (bat-SL-CoVZC45 dhe bat-SL-CoVZXC21) të cilët për herë të parë janë identifikuar në vitin 2018 në Kinën lindore.
