Putin: Rreziku nga konflikti global po rritet!
Duke folur në Samitin e Organizatës së Shanghait për Bashkëpunim, SCO, Presidenti rus Vladimir Putin, tha se potencial global për konflikt po rritet dhe Rusia do të kundërshtoj çdo sanksion dhe provokim.
Vladimir Putin falënderoi anëtaret e Organizatës së Shanghait për Bashkëpunim për “mbështetje për ruajtjen e rendit kushtetues të Rusisë” gjatë rebelimit të armatosur të grupit Wagner, raporton Agjencia ruse e lajmeve, RIA.
“Populli rus është i konsoliduar si kurrë më parë. Qarqet politike ruse dhe e gjithë shoqëria kanë treguar qartë solidaritetin dhe përgjegjshmërinë e lartë për fatin e atdheut duke marrë pjesë në frontin e përbashkët kundër përpjekjeve për rebelim të armatosur,” tha Vladimir Putin duke përfunduar:
“Dëshiroj të shfrytëzoj rastin që të falënderoj kolegët e mi nga vendet e SCO, që kanë shprehur mbështetjen për aksionet e udhëheqjes ruse për mbrojtjen e rendit kushtetues, jetës dhe sigurisë së qytetarëve. Jashtëzakonisht e vlerësojmë.”
Ndryshe, Organizata e Shanghait për Bashkëpunim, SCO, e njohur si Pakti i Shanghait, është aleancë transkontinentale politike, ekonomike, e sigurisë dhe ushtarake, e cila është themeluar në vitin 1996 nga Kina, Kazakistani, Kirgistani, Rusia dhe Taxhikistani, ndërsa më vonë i janë bashkuar edhe Uzbekistani, India dhe Pakistani.
