Qëllohet godina e Top Channel, vritet roja i sigurisë 

Java e fundit e muajit mars filloj me vrasje dhe këtë radhë viktimë aksidentale ishte roja e TV Top Channel i cili ishte në detyrë kur u qëllua me armë zjarri drejt godinave të këtij televizioni.

Policia bënë të ditur se rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel.

Si pasojë e të shtënave ka humbur jetën roja i sigurisë shtetasi Pal Kola, 60 vjeç (punonjës i një shoqërie për ruajtjen fizike të objekteve).

Autorët janë larguar më pas drejt Durrësit dhe dyshohet se kanë djegur automjetin tip “Range Rover” në Golem, Kavajë. Brenda mjetit policia ka gjetur dy armë zjarri.

Sipas hetimeve, në vendin e ngjarjes janë gjetur mbi 25 gëzhoja. Policia ka sekuestruar pamjet e kamerave të sigurisë së objektit, por edhe të bizneseve në autostradë, për të zbuluar lëvizjet e autorëve.

Ndërkohë vijon puna e grupi hetimor për sekuestrimin e provave që do të shërbejnë për zbardhjen e ngjarjes, identifikimin dhe kapjen e autorëve.

Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve.