Qeveria e re e Kosovës, dialogu me Serbinë nuk është prioritet

Njohësit e çështjeve politike nuk e shohin dialogun me Serbinë si çështjen parësore me të cilën duhet të merret Qeveria e re e Kosovës. Sipas tyre, zhvillimi ekonomik, zbutja e papunësisë, reforma në shëndetësi e arsim dhe mirëqenia për qytetarët duhet të shkojnë paralel me fuqizimin e subjektivitetit ndërkombëtar të Kosovës.

Lista me prioritetet dhe sfidat e qeverisë së ardhshme është e gjatë, por ligjëruesi në UBT, Armend Muja, mendon se secila qeveri e re, duhet të ketë katër prioritete, zhvillimin ekonomik dhe adresimin e papunësisë, luftimin e krimit e korrupsionit, reformat në arsim, shëndetësi e drejtësi dhe përfundimin e dialogut me Serbinë:

 “Gjithë energjia që shpenzohet në dialog, nuk duhet t’i neglizhojë prioritet që janë sfida reale për qytetarët e Kosovës. Qytetari i Kosovës për momentin është duke e lëshuar vendin në mungesë të perspektivës ekonomike, qytetari i Kosovës është duke marrë arsim të dobët në mungesë të prioritetizimit qeveritar, ka trajtime të dobëta shëndetësore, këto duhet të shkojnë paralelisht, përsosja e brendshme duhet të shkojë paralel me përpjekjet për fuqizimin e subjektivitetit ndërkombëtar.”

E politologu Ramush Tahiri, mendon se qeveria e ardhshme duhet të jetë një qeveri e koalicionit programor dhe të ketë bashkëpunim me faktorin ndërkombëtar, me agjendë të qartë euroatlantike.

“Pra, duhet të  përmbushen të gjitha kushtet dhe kriteret që kërkohen nga BE për anëtarësim, në rend të parë e ka liberalizimin e vizave si çështje urgjente që duhet të zgjidhet për qytetarët e Kosovës, me të cilin kjo qeveri e dëshmon bashkëpunimin ndërkombëtar që është në rrugën evropiane dhe e kthen kredibilitetin për popullin e Kosovës i cili ndjehet i zhgënjyer që ka mbetur i vetëm në Evropë pa lëvizje të lirë,” tha Tahiri duke shtuar se bashkësia ndërkombëtare do të shtyjë përpara rifillimin e dialogut, për çka Kosova duhet të tregojë përkushtim për normalizimin e marrëdhënieve me Serbinë. Megjithatë, Tahiri të rëndësishme e sheh edhe zhvillimin ekonomik:

 “Rimëkëmbja e Kosovës, që të bëhet vend i përshtatshëm me rritje ekonomike, reforma, në shëndetësi, arsim, politikat sociale dhe i cili tërheq investime të huaja. në rend të parë gjithashtu është me rëndësi që Kosova të ketë sundim të ligjit në këtë bazë luftën kundër kriminalitetit edhe kundër korrupsionit, i cili po thuhet se ka marrë përmasa të një epidemie në Kosovë dhe kryesisht bëhet nga strukturat shtetërore dhe strukturat e biznesit që janë të lidhura me shtetin.”

Dhe profesori universitar, Mazllum Baraliu, thotë për Radio Kosovën se prioritet mbi prioritete i çdo qeverie do të duhej të ishte zhvillimi ekonomik:

 “Krijimi i vendeve të reja të punës, krijimi i mundësive për investime të huaja, sepse nuk kemi ngritje por rënie të investimeve të huaja direkte dhe indirekte që nga viti 2008 e këndej. Zgjidhja e çështjes së të rinjve që të mbetën në Kosovë e mos të zbrazet vendi, ku mbi 170  deri në 200 mijë që janë larguar nga Kosova. Përveç kësaj do të duhej të ishte edhe sigurimi social i qytetarëve me nevojë, pra, reformimi i sistemit të sigurimit social.”

Ndërkohë bashkësia ndërkombëtare në vazhdimësi ka kërkuar vazhdimin e dialogut me Serbinë si dhe heqjen e taksës.