Qytetarët me pasaporta të Kosovës nga 1 janari mund të udhëtojnë pa viza

Të gjithë qytetarët që kanë pasaportën e Kosovës, nga 1 janari 2024 do të mund të udhëtojnë drejt zonës Shengen pa viza për qëndrime afatshkurtra.

Lajmin e ka bërë të ditur Ambasada e Gjermanisë në Prishtinë duke dhënë dhe detaje të qëndrimit dhe shtetet që mund të vizitohen pa viza nga 1 janari, kur fillon zyrtarisht liberalizimi i vizave për Kosovën.

“Udhëtimi pa viza ju mundëson të udhëtoni pa vizë për qëndrime të shkurtra, për shembull, si turist, për të vizituar miqtë ose familjen, për të marrë pjesë në ngjarje kulturore ose sportive, takime afariste, trajtim mjekësor, për programe arsimore afatshkurtra si seminare, konferenca, punëtori, shkolla verore dhe çdo aktivitet të ngjashëm,” thekson Ambasada e Gjermanisë në Prishtinë përmes njoftimit duke saktësuar se qytetarët e Kosovës mund të qëndrojnë deri në 90 ditë në çdo periudhë 180-ditore brenda zonës Schengen.

Ndryshe, vendimi për liberalizimin e vizave për Kosovën u botua në Gazetën Zyrtare të Bashkimit Evropian në prill të vitit 2023 .