Ra edhe Gjykata Kushtetuese: Marrëveshja Meloni-Rama, në përputhje me Kushtetutën!

Ndonëse Kryeministri Edi Rama e tha qartë se Marrëveshja Meloni-Rama për përballimin e refugjatëve është një formë përmes së cilës mund të shlyhet sadopak borxhi që Shqipëria i ka Italisë, dhe se një marrëveshje të këtij lloji nuk do të mund ta firmoste me asnjë vend tjetër të Bashkimit Evropian, por Italia përbën ndryshim për vetë faktin e asaj çka ka bërë për shqiptarët që prej kohës së eksodit të viteve ’90, Gjykata Kushtetuese nuk foli juridikisht por si shërbëtore partiake e Kryeministrit.

Duke votuar 5:4, Gjykata Kushtetuese shprehet se kjo Marrëveshje është në përputhje me Kushtetutën, duke i hap rrugë ratifikimit nga Parlamenti dhe ngritjes së dy qendrave të pritjes së emigrantëve në Shëngjin.

Ndryshe, kjo Marrëveshje u dërgua në Gjykatën Kushtetuese nga 30 deputetë të opozitës dhe u pezullua më 13 dhjetor kur dhe Gjykata e mori në shqyrtim ndonëse ishte menduar të ratifikohet në seancën plenare të 14 dhjetorit 2023.

Për të kuptuar çdo qytetar pse sot e tutje janë pa Gjykatë Kushtetuese, duhet t’ju shërbej deklarata e Kryeministrit Edi Rama ditën e firmosjes kur u shpreh qartë se këtë Marrëveshje nuk do ta bënte me asnjë vend tjetër të BE-së.

“Qysh nga fillimi ne nuk do ta bënim këtë marrëveshje me asnjë vend tjetër të BE-së sepse ka një ndryshim, të madh dhe një ndryshim historiko-kulturor dhe gjithashtu edhe emocional që lidh Shqipërinë me Italinë dhe shqiptarët me italianët.

Nuk besoj që ne nuk do të jemi në gjendje që në vitet që do vijnë për të parashikuar vitet që mund të kemi përpara për të paguar atë borxhin që kemi drejt Italisë, dhe popullit të Italisë, për atë që kanë bërë për ne, nga dita që kemi mbërritur në këtë anë të bregut. Nëse Italia thërret, Shqipëria përgjigjet.”