Radoiçiç në liri, deputetja britanike: Asnjë masë ndaj Serbisë, Kosova nën sanksione nga BE!
Pas lirimit të përgjegjësit kryesor për sulmin terrorist në veri të Kosovës, terroristin dhe të sanksionuarin e SHBA dhe Britanisë së Madhe, Milan Radoiçiç, ka reaguar Kryetarja e Komisionit për Politikë të Jashtme pranë Parlamentit të Mbretërisë së Bashkuar, Alicia Kearns, duke shprehur shqetësime për mosndëshkimin e Serbisë nga ndërkombëtarët edhe pas agresionit të 24 shtatorit ndërkohë Kosova mbetet nën sanksione.
“Radoiçiç mbetet i lirë në Serbi. Ende nuk ka masa për Beogradin nga Britania e Madhe, SHBA, BE, pavarësisht vrasjes së oficerit të policisë, armatosjes së paraushtarakëve, rrëmbimit të policëve, dhe rolit në plagosjen e rëndë të trupave të NATO-s,” shprehet deputetja britanike, Alicia Kearns në reagimin e saj përmes rrjetit social X duke përfunduar:
“Megjithatë, Kosova mbetet nën sanksionet e BE-së. Diplomaci parandaluese?”
Ndryshe, në fillkorrikun e këtij viti, Kryetarja e Komisionit të Punëve të Jashtme pranë Parlamentit të Mbretërisë së Bashkuar, Alicia Kearns, ka ngritur alarmin se armët që po kontrabandohen nga Serbia në Kosovë përmes autoambulancave dhe po shkarkohen në kishat ortodokse.
Regjimenti ushtarak britanik i kthyer nga misioni i KFOR-it, tha ajo, kishte qenë në dijeni se kishte armë të kontrabanduara nga Serbia në kishat ortodokse serbe me autoambulanca.
Sipas saj, trupat britanike janë penguar për t’i konfiskuar këto armë.
“Qeveria është e vetëdijshme, me Fusilierët [regjiment ushtarak britanik] që sapo janë kthyer nga shërbimi në KFOR, se ka armë që kontrabandohen përtej kufirit nga Serbia në kishat ortodokse me autoambulanca. Kur trupat tona vihen në dijeni për këtë dhe përpiqen të marrin leje për të shkuar dhe për t’i marrë ato, lejet zgjasin shumë. Deri në momentin që ka leje ‘të papritura’ një ambulancë thuajse ka shkuar në kishë dhe ka shkarkuar përsëri të gjitha armët,” tha deputetja britanike, Alicia Kearns.
