Raport për Komisionin e Venecias/ Pse u shtyu data e zgjedhjeve, Presidenti jep 16 arsye…
Presidenti i Republikës, Ilir Meta, ka bërë publik Raportin e detajuar që i ka dërguar Komisionit të Venecias ku sqarohet Dekreti i tij për shtyrjen e datës së zgjedhjeve.
Deri në anulimin e datës 30 Qershor, Presidenti shpjegon të gjitha hapat e ndjekura ndërsa edhe në këtë raport ka zënë vend faktin i bërë publik ditë më parë në Komisionin Hetimor mbi djegien e Parlamentit.
“Presidenti mori informacion të besueshëm zyrtar nga institucione shumë të rëndësishme të sigurisë kombëtare se protesta e datës 8 qershor do të shfrytëzohej për djegien e Parlamentit dhe me qëllime destabilizuese,” thekson Meta midis të tjerash në dokument.
Në Raportin e Metës sqarohet edhe roli kriminal i KQZ dhe Kolegjit Zgjedhor i cili vendosi për Dekretin e Presidentit.
“Gjykata Kushtetuese është i vetmi organ i mandatuar për të vendosur mbi kushtetueshmërinë e dekreteve presidenciale, ndërsa Kolegji Zgjedhor ka mandat të mbikëqyrë ligjmërinë e procesit zgjedhor”, thuhet në Raport ndërsa për Komisionin Qendror të Zgjedhjeve dhe Parlamentin, ku të dyja institucionet kanë shumicë përfaqësuese nga Partia Socialiste, ai shton:
“Kanë vepruar në mënyrë tepër të koordinuar por jo institucionale me njërit-tjetrin me qëllim që dekreti i Presidentit të Republikës nr.11199 datë 10.06.2019 të mos zbatohet por pa mundur të shprehen ligjërisht me një akt për të cenuar apo shfuqizuar fuqinë detyruese të tij (Dekretit)”.
“Data 30 qershor 2019 nuk ekziston si datë zgjedhjesh“ për organet e qeverisjes vendore të Republikës së Shqipërisë, pasi akti i Presidentit të Republikës që e caktonte këtë datë është shfuqizuar nga vetë autoriteti kushtetues që e ka nxjerrë atë (Presidenti i Republikës),” thekson Ilir Meta duke dhënë edhe 16 arsyet pse vendosi të ndërhynte në kushtet e një krize të rëndë politike, kushtetuese, institucionale dhe përfaqësimi:
Në vlerësimin e tij, Presidenti i Republikës thekson se duhet të ndërhynte në mënyrë të tillë që t’u ofronte palëve kohë për reflektim dhe për gjetjen e një zgjidhjeje përmes dialogut të pazëvendësueshëm politik, duke siguruar njëkohësisht moscënimin e parimeve kushtetuese të pluralizmit politik dhe kthimin e paqes sociale në vend.
E gjithë sjellja e Presidentit të Republikës dhe përpjekjet e tij, duke qenë shumë i ndërgjegjshëm dhe për detyrimet që duhen përmbushur veçanërisht për çeljen e negociatave të anëtarësimit me BE, Ilir Meta është i bindur se kanë synuar shmangien e një konflikti civil, të një procesi të dështuar zgjedhor dhe realizimin e zgjedhjeve vendore gjithëpërfshirëse dhe demokratike për të përmirësuar besueshmërinë e vendit në përmbushjen e kritereve politike në prag të 17-18 tetorit 2019, kur do të merret vendimi i Këshillit Europian për Shqipërinë.
