Raporti Freedom House, Hipokrizia e bashkautorit të përkeqësimit: Thellësisht i shqetësuar!

Pas publikimit të Raportit të fundit të Freedom House që e kategorizon Shqipërinë edhe këtë vit në grupin e regjimeve hibride/demokraci në tranzicion ndërsa konstaton se është shënuar rënie në qeverisjen demokratike dhe procesin zgjedhor, bashkëautori i këtij përkeqësimi, Presidenti i Republikës, Ilir Meta, duke bërë të paditurin reagon duke u shprehur thellësisht i shqetësuar nga konkluzionet e raportit:

“Konkluzioni në raport se: ‘Nga Tirana në Tbilisi, ata që janë në pushtet, nuk janë të interesuar që ta bëjnë parlamentin një vend ku diskutohet’ është një këmbanë e fortë alarmi. Është koha për një ringritje të menjëhershme dhe për një trajektore të re të demokracisë, shtetit ligjor dhe respektimit të të drejtave të njeriut, me qëllim përmbushjen sa më parë të kushteve të vendosura nga Bashkimi Europian, me qëllim integrimin e plotë të vendit pa zvarritje të mëtejshme,” thekson Meta në reagimin e tij përmes rrjetit social Facebook duke shtuar se përkeqësimi i treguesve për nivelin e demokracisë, rënia ne qeverisje dhe proces zgjedhor kërkon një reflektim dhe përgjigje nga të gjithë. Por kështu nuk e thotë as Raporti dhe as Autori i kapitullit për Shqipërinë i cili e thotë qartë se është konfliktualitet ai i cili u nevojitet elitave të papërgjegjshme politike, ku bënë pjesë edhe Ilir Meta.

 “E gjithë situata politike përfshiu edhe institucionin e presidentit dhe nga ai moment u shënuan një sërë përplasjesh institucionale duke filluar mes presidentit, parlamentit dhe Komisionit Qendror të Zgjedhjeve. Më pas kemi procedurën për shkarkimin e presidentit dhe rreth fundit të vitit të shkuar, kemi edhe përplasjet mes presidentit, parlamentit lidhur me emërimin e gjyqtarëve të gjykatës kushtetuese. Të gjitha këto përplasje institucionale, do të thoja vijnë për herë të parë në realitetin shqiptar dhe kanë qenë arsyet kryesore për përkeqësimin e dy dimensioneve, edhe të zgjedhjeve, edhe të qeverisjes demokratike,” thekson autor i kapitullit për Shqipërinë në raportin Vendet në Tranzicion 2020 dhe Drejtori i projektit të Institutit për Demokraci dhe Ndërmjetësim në Tiranë, Gjergji Vurmo, ndërsa analizon faktorët që sollën rënien në nivelin e demokracisë në Shqipëri duke u shprehur qartë se elitave u intereson konfliktualiteti që të mbrojnë interesat e tyre:

“Mendoj se është ai konfliktualitet i cili u nevojitet elitave të tilla të papërgjegjshme politike jo vetëm në Shqipëri por edhe në vende të tjera. Është pikërisht konfliktualiteti politik ai që zhvendos vëmendjen nga problematika të tjera akoma më të mëdha,” thotë Gjergji Vurmo i cili në një intervistë për VOA sjell dhe shembullin konkret i cili për fat të keq sërish nuk do ti jap fund pandëshkueshmërisë:

“Pas dy-tre muajsh do të na duhet të duartrokasim marrëveshjen mes shumicës dhe opozitës brenda dhe jashtë parlamentare lidhur me reformën elektorale. Por a do të jetë kjo reformë elektorale një përgjigje për sfidën më të madhe të vendit që është rikthimi në balancë i atyre mekanizmave të kontrollit, të balancës së pushteteve, që është ajo që u nevojitet shqiptarëve. A do të jetë ajo një përgjigje për t’i dhënë fund pandëshkueshmërisë në Shqipëri, apo fundit të korrupsionit të lartë. Dyshoj që do të jetë.”

Ja postimi i plotë:

Thellësisht i shqetësuar nga konkluzionet e raportit të organizatës “Freedom House”.

Përkeqësimi i treguesve për nivelin e demokracisë, rënia ne qeverisje dhe proces zgjedhor kërkon një reflektim dhe përgjigje nga të gjithë.

Konkluzioni në raport se: “Nga Tirana në Tbilisi, ata që janë në pushtet, nuk janë të interesuar që ta bëjnë parlamentin një vend ku diskutohet” është një këmbanë e fortë alarmi.

Është koha për një ringritje të menjëhershme dhe për një trajektore të re të demokracisë, shtetit ligjor dhe respektimit të të drejtave të njeriut, me qëllim përmbushjen sa më parë të kushteve të vendosura nga Bashkimi Europian, me qëllim integrimin e plotë të vendit pa zvarritje të mëtejshme.