Rashiç: Interpoli lëshon urdhërarrest për Radoiçiçin
Organizata ndërkombëtare e policisë, Interpol, lëshoi urdhërarrest për ish-nënkryetarin e Listës Srpska, Milan Radoiçiç, në lidhje me sulmin e armatosur në Banjskë, në veri të Kosovës.
Lajmin e konfirmoi për RFE, ministri për Komunitete dhe Kthim i Kosovës, Nenad Rashiç duke saktësuar se urdhri është lëshuar me ndërmjetësimin e misionit të Kombeve të Bashkuara në Kosovë, UNMIK, në bazë të kërkesës së Ministrisë së Punëve të Brendshme të Kosovës.
Meqë Kosova nuk është anëtare e Interpolit, urdhërarrestet ndërkombëtare lëshohen në këtë mënyrë.
Çka ndodhi në Banjskë?
Radoiçiç mori përgjegjësinë për sulmin e 24 shtatorit në Banjskë të Zveçanit, ku grupe të armatosura serbësh sulmuan policinë e Kosovës, duke vrarë rreshterin Afrim Bunjaku.
Në përleshjet e armatosura që pasuan, u vranë edhe tre sulmues serbë.
Përmes një letre publike të lexuar nga avokati i tij më 29 shtator, Radoiçiç tha se personalisht e ka organizuar rebelimin e armatosur në veri të Kosovës.
Ai e mohoi përgjegjësinë e autoriteteve shtetërore të Serbisë në këtë sulm.
Radoiçiç, ish-nënkryetar i Listës Srpska në Kosovë, u mor në pyetje nga Prokuroria e Serbisë në muajin tetor dhe u ngarkua me disa vepra, përfshirë trafikim armësh dhe shkaktim të rrezikut të përgjithshëm.
Megjithatë, gjykata në Beograd e liroi nga paraburgimi, por ia konfiskoi dokumentet.
Autoritetet e Kosovës bënë përgjegjëse udhëheqjen shtetërore të Serbisë për sulmin që nxiti shqetësime për qëndrueshmërinë në rajon, ndërsa Serbia e mohoi përfshirjen dhe drejtoi gishtin kah serbët e Kosovës.
Në një intervistë dhënë RFE-së më 29 shtator, ministri i Brendshëm i Kosovës, Xhelal Sveçla, tha se MPB do të kërkojë ekstradimin nga Serbia në Kosovë “të të gjithë atyre që kanë qenë të përfshirë në planifikimin dhe realizimin e aksionit terrorist” në Banjskë.
Në atë kohë, Sveçla tha se hetimet kanë treguar se mbi 80 terroristë kanë qenë të përfshirë në sulmin në Banjskë.
Mediat në Serbi raportuan se Interpoli ka lëshuar urdhërarreste edhe për 11 persona të tjerë në lidhje me këtë sulm, por RFE nuk arriti ta konfirmojë informacionin në mënyrë të pavarur.
Bazuar në raportin e Sekretarit të Përgjithshëm të Kombeve të Bashkuara nga tetori i këtij viti, UNMIK-u ndihmoi në lëshimin e 44 urdhërarresteve dhe 12 kërkesave për ekstradim në Kosovë nga vendet anëtare të Interpolit.
Në bazë të kërkesave për informacion u hapën edhe 640 lëndë të reja. Në total, 974 lëndë, që kanë të bëjnë me territorin apo banorët e përhershëm të Kosovës, janë ende të hapura./RFE/
