Reagimet pas fitores historike: Sot, nëpërmjet Distrias, Kosova shkëlqeu para tërë botës!
Pas fitores së madhe në Lojërat Olimpike “Tokyo 2020” të xhudistes Distria Krasniqi, e cila me medaljen e saj të artë bëri krenar çdo shqiptar, kanë reaguar dhe liderët politik e institucional të Kosovës dhe Shqipërisë me një mesazh të qartë: Sot, nëpërmjet Distrias, Kosova shkëlqeu para tërë botës.
“Distria i solli Republikës sonë medaljen e dytë të artë olimpike. Nder e krenari e lumturi e papërshkrueshme. Ajo e ngriti sot flamurin e shtetit të saj në piedestalin më të lartë. Me suksesin e saj olimpik ajo nderoi një komb të tërë, si dhe e gëzoi fort çdo zemër në Kosovë por edhe shumë të tjera anë e mbanë botës.
Distria, e para e botës, dëshmoi sot sërish se është e pamposhtur dhe se është krenaria e vendit tonë. Ajo dëshmoi që talenti dhe puna triumfojnë gjithnjë,” ishte reagimi i parë i Presidentes së Kosovës, Vjosa Osmani duke përfunduar:
Sot, nëpërmjet Distrias, Kosova shkëlqeu para tërë botës. Sot dhe përherë, Kosova do të krenohet me ty. Bravo!
Ndërkohë Kryeministri i Kosovës, Albin Kurti, në reagimin e tij shkruan:
“Distria e Artë! Në garën e parë në Lojërat Olimpike Tokio 2020, Kosova fiton medaljen e artë. Faleminderit që po bëni krenar secilin prej nesh. Me zemër jam me ju në Tokio.”
Për Kryetarin e Partisë Demokratike, Lulzim Basha, e arta e Distria Krasniqit është:
Krenari!
Presidenti i Republikës së Shqipërisë, Ilir Meta, ka humbur në drejtim të paditur që nga inicimi i procedurës së shkarkimit ndërsa ustai i propagandës, Kryeministri Edi Rama, në reagimin e tij shkruan:
“Luaneshë! Bravo, Bravo, Bravo!” thekson Edi Rama në reagimin e tij duke përfunduar:
Respekt!
Ndryshe, xhudistja kosovare Distria Krasniqi, në përballjen finale me japonezen Funa Tonaki, fitoi medaljen e parë dhe të artë për Kosovën në “Tokyo 2020”.
