Reciprociteti, Haradinaj: Mos i zhgënjeni qytetarët! Kurti: Do ta zbatojmë…
Në morinë e çështjeve të nxehta sot në Parlamentin e Kosovës, reciprociteti me Serbinë dhe paqartësia e Qeverisë ishin të pashmangshme. Kryetari i Aleancës për Ardhmërinë e Kosovës, Ramush Haradinaj, duke kritikuar Qeverinë Kurti për vendosjen apo jo të reciprocitetit me shtetin serbë tha se qeveria nuk duhet t’i zhgënjejnë qytetarët e Kosovës edhe në këtë temë. Por Kryeministri i Kosovës, Albin Kurti ka siguruar dhe sot se do ta zbatojnë reciprocitetin me Serbinë në kohën kur do të jenë të përgatitur për zbatim të plotë të tij.
“Kemi një listë të aspekteve të tilla, unë e kuptoj që disa tema janë të mëdha, të vështira. Çështjen e reciprocitetit unë iu kam thënë po të isha unë nuk e bëj, ju keni kërkuar për ta bërë, por unë kam deklaruar publikisht nuk e bëj sepse mendoj që kemi hyrë në një etapë të re kur ka qenë taksa kemi pasur një situatë ndryshe, kemi hyrë në një etapë të re, ju nuk po e bëni. Por të paktën mos i zhgënjeni qytetarët edhe në këtë temë, të paktën në këta kanë pritur që vërtetë do të jeni të kujdesshëm, pra që nuk do të lejoni korrupsion, nuk do të jepni sinjale që qojnë dilema,” tha Ramusha Haradinaj duke përfunduar:
“Se vërtetë ju jeni më të korruptuar se krejt tjerët që kanë qenë përpara, e ju kisha bë thirrje që t’ia voni mendjen kësaj pune.”
Albin Kurti nga ana tij sqaroi se Serbia bën përgjithësisht barriera sporadike ndaj mallrave të Kosovës por ka edhe barriera sistematike.
“Për ta zbatuar reciprocitetin që ne jemi zotuar, kemi nevojë që t’iu bëjmë ballë suksesshëm barrierave sporadike dhe atyre sistematike. Kjo nënkupton që neva na duhet kohë për t’u përgatitur që ta zbatojmë të plotë reciprocitetin. Është e domosdoshme që ne të përgatitemi që mos të dështojmë në zbatim. Pse ne mund të dështojmë në zbatim, sepse jemi qeveria e parë e cila merremi me reciprocitetin,“ tha Kryeministri i Kosovës duke shtuar se reciprocitetin nuk e vendosin për hakmarrje ndaj dikujt por e kanë si parim që derivon nga koncepti i barazisë.
“Ne do ta zbatojmë reciprocitetin në kohën kur do të jemi të përgatitur për zbatim të plotë të tij. Kjo është çështje e qeverisë tonë dhe kjo do të bëhet. Dikujt mund të mos i pëlqej por ne këtë do ta bëjmë. Sa për votat e opozitës për, edhe në këtë aspekt nuk kam nevojë, siç e dini.”
Edhe në seancën e sotme të Parlamentit të Kosovës, Kryeministri Albin Kurti u pyet nga PDK dhe Kryetari i Grupit Parlamentar, Abelard Tahiri, pas deklaratës në Bruksel, se kush janë kriminelët e luftës në Kosovë e që duhet të largohen nga institucionet. Kurti tha edhe se këto deklarata nuk i ka bërë për të parën herë në Bruksel, gjithsesi sqaroi:
“Pa numër herë edhe në këtë Kuvend por edhe në media në këto vitet e fundit unë kam folur për kriminelët e luftës dhe paqe. Nuk e kam thënë për herë të parë në Bruksel. Po ta bëja për herë të parë do mund të bënte ndonjë nën pyetje ndokush. Por e kam thënë pa numër herë. Serbia po e dinë për kë e kam fjalën, Brukseli po e dinë për kë e kam fjalën. S’di pse lajmërohen disa në Kosovë kot për së kot. Unë nuk besoj që ka luftëtarë të UÇK-së që janë kriminelë të luftës, por unë besoj që kriminelë të luftës nuk ka vetëm në Serbi, por ka edhe në Veri të Kosovës, ka edhe në Bosnje, ndoshta ka edhe në Mal të ZI,” tha Kryeministri i Kosovës, Albin Kurti duke përfunduar:
“Aty nuk kam folur me shtetet, kam folur për rajonin sepse darka e punës nuk ishte bilateralë ishte mulateralë.”
