Reshje bore intensive, MMPHI: Të gjitha rrugët në Kosovë të kalueshme!

Pavarësisht reshjeve të vazhdueshme të borës, Zv/Ministri i Infrastrukturës, Hysen Durmishi ka bërë të ditur se të gjitha rrugët po mirëmbahen dhe janë të kalueshme.

“Kompanitë e kontraktuara nga MMPHI, janë në terren për pastrimin e akseve rrugore nga bora, normalizimin e qarkullimit rrugor dhe garantimin e sigurisë për drejtuesit e automjeteve që nga orët e hershme të mëngjesit,” shprehet Htsen Durmishi përmes rrjetit social Facebook duke i bërë thirrje qytetarëve të bëjnë kujdes gjatë drejtimit të mjetit dhe të respektojnë rregullat e qarkullimit rrugor ndërsa përfundon: 

“Jemi vazhdimisht në terren për t’u siguruar se po punohet me intensitet të shtuar për pastrimin e rrugëve, duke u kujdesur për të lehtësuar lëvizjen e qytetarëve nëpër rrugët e Kosovës.”

Ndërkohë Instituti Hidrometeorologjik i Kosovës, IHMK, njofton se sot parashikohet të mbajë mot i vranët dhe me reshje bore.

“Temperaturat minimale parashikohen të lëvizin ndërmjet -3 deri -1 °C, ndërsa maksimalet e ditës parashikohen të lëvizin ndërmjet -1 deri 1 °C.

Do të fryjë erë nga drejtimi i veriperëndimit me shpejtësi 1-5m/s,” njofton IHMK.