Reshjet e borës, ARRSH: Kujdes në akset…

Pas reshjeve intensive të borës gjatë natës në Kukës-Ura e Zapodit, Pukë-Fushë Arrëz-Kukës dhe në Qarkun e Korçës, Autoriteti Rrugor Shqiptar, ARRSH, raporton se qarkullimi kryhet pa probleme ndërsa bënë thirrje për kujdes dhe pajisje me me goma dimërore dhe zinxhirë nëse udhëtoni për në zonat malore.

“Gjatë natës është punuar me mjete borëpastruese, qarkullimi kryhet pa probleme. Tregoni kujdes të shtuar gjatë drejtimit të mjetit në kohë me reshje, pajisuni me goma dimërore dhe zinxhirë kur udhëtoni për në zonat malore,” shprehet Autoriteti Rrugor Shqiptar duke rekomanduar uljen e shpejtësisë, respektimin e sinjalistikës dhe udhëzimet e Policisë Rrugore.

Ndërkohë Instituti i Gjeoshkencave për sot parashikon që reshjet e dëborës pritet të përfshijnë zonat Verilindore, Lindore dhe Juglindore të territorit, në lartësinë 400m mbi nivelin e detit.