Reshjet e borës vazhdojnë, ARRSH: Zinxhirët e domosdoshëm në akset…
Reshjet e dëborës vazhdojnë ndërkohë Autoriteti Rrugor Shqiptar, ARRSH, raporton për rënie gurësh e materialesh të cilat janë pastruar menjëherë ndërsa borëpastrueset po punojnë pa ndërprerje, por, i sugjerojnë drejtuesit e mjeteve të pajisen me zinxhirë për disa akse rrugore.
Nga ana tjetër Policia Rrugore udhëzon drejtuesit e mjeteve të pajisen me goma dimërore, të ulin shpejtësinë dhe të respektojnë sinjalistikën.
“Në Peshkopi-Maqellare dhe Ulëz-Burrel vazhdojnë reshjet e dëborës. Mjetet borëpastruese po punojnë pa ndërprerje për pastrimin e rrugës dhe shpërndarjen e kripës për të evituar ngricat. Rruga është e hapur për qarkullimin e mjeteve,” raporton Autoriteti Rrugor Shqiptar në njoftimin e fundit duke sugjeruar drejtuesit e mjeteve të pajisen me goma dimërore dhe zinxhirë si dhe të ulin shpejtësinë.
Ndërsa në aksin Skuraj-Burrel, ashtu si dhe në gjithë vendin reshjet e shiut me intensitet mesatar kanë sjellë rënie gurësh e materialesh që janë pastruar për të mos lejuar të krijohet vështirësi në qarkullim.
“Në zonën veriore ka pasur reshje dëbore me intensitet dhe erë si në Ura e Zapodit-Shishtavec në Tamarë-Vermosh, në Qafë Thore-Bogë, Klos, Peshkopi, Bajram Curri-Fierzë, në Tropojë,” raporton ARRSH.
Ndërkohë në mëngjes edhe në Qafë Thanë kanë filluar reshjet e dëborës me intensitet mesatar
“Mjetet borëpastruse dhe punëtorët e mirëmbajtjes kanë qenë në terren pa ndërprerje. Rrugët janë të pastruara nga dëbora dhe qarkullimi vijon pa probleme,” thekson Autoriteti Rrugor Shqiptar duke sugjeruar drejtuesit e mjeteve të pajisen me goma dimërore dhe zinxhirë kur udhëtojnë për në segmentet me prezencë dëbore, të ulin shpejtësinë, dhe të respektojnë sinjalistikën dhe udhëzimet e Policisë Rrugore.
