Rezoluta për Kosovën miratohet me 101 vota, nuk u mbështet nga “properëndimorët” e Bashës
Me 101 vota për, abstenimin e Kreshnik Çollakut dhe mosvotimin nga Arbi Agalliu, Eralda Bane, Orjola Pampuri dhe Enkelejd Alibeaj, Parlamenti i Shqipërisë miratoi Rezolutën e kompromisit në mbështetje të Kosovës, ku kërkohet hetim ndërkombëtar për sulmin terrorist serb në Banjskë.
E veçanta e kësaj seance plenare ishte vota e “properëndimorëve” injorantë të Lulzim Bashës, që përkundër mangësive që ka Rezoluta, refuzimi i tyre nuk kishte lidhje as me BE, as me SHBA dhe aq më pak me Kosovën!
Kreshnik Çollaku i cili ka depozituar 3 amendamente abstenoi duke thënë se nuk mjaftohet të quhen terrorist ata që kryen sulmin e 24 shtatorit në Banjskë sepse kështu i quan edhe Presidenti i Serbisë, Aleksandar Vuçiç! Se ku e ka dëgjuar Vuçiçin ky deputet i Bashës nuk dihet, por Presidenti i Serbisë është shprehur qartë se ata janë “heronjë të shtetit sherb” ndërsa ata që u vranë janë “martirë dhe heronjë”!
Ndërsa katër deputetët tjerë, si gjithmonë ngelën të ekspozuar pa shtyllë kurrizore dhe konfirmuan se së bashku me Çollakun ishin aty për ti mundësuar Kryeministrit Edi Rama interpelancën e shpëlarjes së gojës antikosovare, i cili tha ato që tha dhe iu bashku katërshes së Lulzim Bashës duke mos e votuar Rezolutën!
Kështu, kjo është Rezoluta e cila u miratua nga Parlamenti i Shqipërisë:
Rezoluta
Në përputhje me angazhimet Kushtetuese të Republikës së Shqipërisë dhe politikën e mbrojtjes së interesave strategjike kombëtare të përbashkëta midis Shqipërisë dhe Kosovës;
Në përkrahje të sovranitetit dhe integritetit territorial të Republikës së Kosovës dhe institucioneve të saj kushtetuese, si dhe të përpjekjeve për mbrojtjen e vlerave demokratike, sigurisë dhe paqes në Kosovë dhe në rajon;
Thellësisht të shqetësuar për situatën e krijuar në Republikën e Kosovës pas sulmit të organizuar ushtarak dhe kriminal të një njësie terroristësh serbë në veri të vendit, më datë 24 shtator 2023;
KUVENDI I REPUBLIKËS SË SHQIPËRISË:
• Mbështet plotësisht dhe njëzëri Rezolutën Nr. 08-R-009 të Kuvendit të Republikës së Kosovës, miratuar në seancën e tij plenare të datës 28 shtator 2023;
• Kërkon nga institucionet kushtetuese të Republikës së Shqipërisë, që në të gjitha instancat ndërkombëtare sikurse dhe në kontaktet bilaterale me partnerët tanë të angazhohen fuqimisht dhe të ndërmarrin të gjitha veprimet e nevojshme për mundësimin e një hetimi ndërkombëtar lidhur me aktin terrorist në veri të Kosovës;
• Inkurajon Qeverinë e Republikës së Kosovës që të punojë krah për krah dhe të bashkohet pa rezerva me aleatët e saj strategjikë, Bashkimin Europian dhe Shtetet e Bashkuara të Amerikës, në funksion të procesit për arritjen e një marrëveshje përfundimtare për normalizimin e marrëdhënieve midis Kosovës dhe Serbisë dhe njohjen përfundimtare të Kosovës prej saj.
K R Y E T A R E
Lindita Nikolla
Ndërkohë tre amendamentet populiste të deputetit Kreshnik Çollaku që janë kërkuar të përfshihen në tekstin e Rezolutës dhe nuk u përfillën janë:
– Parlamenti i Shqipërisë i bën thirrje 5 vendeve anëtare të Bashkimit Europian, 4 prej të cilave edhe anëtare të NATO-s, që deri më sot nuk e njohin Kosovën të hedhin këtë hap të rëndësishëm, jo vetëm për Kosoven por për paqen e stabilitetin në Ballkan dhe Europë. Kjo do t’i hapte rrugë Kosovës të nisë proceset e anëtarsimit në NATO dhe do t’i mbyllte çdo hapësirë Serbisë dhe vendeve si Rusia qe e perdorin ate per destabilizimin e rajonit.
– Parlamenti i Shqipërisë i kërkon Bashkimit Europian revokimin e masave shtrënguese ndaj Kosovës ,pasi në kushtet aktuale ato po dëmtojnë në menyrë të padrejtë qytetaret e Kosovës. Ngjarjet e 24 shtatorit kërkojnë në reflektim edhe nga Bashkimi Europian në raport me Kosovën siç e ka theksuar dhe ndermjetesi europian Lajçak
– Parlamenti i Shqipërisë bazuar në fakte të pakundërshtueshme për rolin e Serbisë në sulmin e 24 shtatorit ndaj shtetit të Kosovës i kerkon Bashkimit Europian qëndrim të qarte dhe masa ndëshkuese ndaj Serbise, lidershipi i së cilës është angazhuar në akte dhe veprime që cenojnë stabilitetin dhe sigurinë në rajon.
Pse populiste?! Shihet qartë se dy amendamentet e para nuk kanë lidhje fare me çështjen ndërsa ai i treti ishte pjesë e Draftit të opozitës i cili u reduktua në “hetim ndërkombëtar lidhur me aktin terrorist në veri të Kosovës” në mënyrë që të arrihet një Rezolutë kompromisi e cila “mbështet plotësisht dhe njëzëri Rezolutën Nr. 08-R-009 të Kuvendit të Republikës së Kosovës, miratuar në seancën e tij plenare të datës 28 shtator 2023”!
