Rheinische Post: Vuçiç ëndërron perandorinë serbomadhe!

Moska po përhap propagandën e saj me dashamirësinë e pushtetit në Beograd. Përgjigja e pamjaftueshme e Perëndimit mund të sjellë luftë, vlerëson gazeta gjermane Rheinische Post.

“Rusia për momentin është në pozicionin mbrojtës në Ukrainë, por Kremlini ka në dispozicion edhe armën e dytë për të rritur ndikimin e tij në gjithë botën,” shkruan gazeta gjermane

Presidenti i Rusisë, Vladimir Putin, po bënë përpjekje që në skenën diplomatike ti bëjë për vete ato shtete që nuk janë shprehur qartë lidhur me luftën në Ukrainë dhe “makineria mediatike moskovite me të gjitha kapacitetet po përhapë propagandën”.

Rheinische Post, thekson, se shembull është Serbia, kandidate për anëtarësim në BE!

“Janë intensifikuar linjat tregtare me Perëndimin. Plotë 60 për qind të aktiviteteve të tregtisë së jashtme të Serbisë realizohen me shtetet e Bashkimit Evropian. Dy të tretat e të gjitha investimeve të huaja vjen nga Evropa perëndimore. Për vetëm dy dekada, Bruxelles i ka paguar Serbisë rreth tre miliardë euro të ndihmës shtetërore, kryesisht nga buxheti gjerman,” shkruan gazeta gjermane Rheinische Post.

“Vuçiç e sheh Putinin si model”

Por, sado që Perëndimi ka nevojë për Serbinë, “presidenti i saj Aleksandar Vuçiç po bënë një politikë jotransparente të lisharëses në mes të aleatit tradicional Rusisë dhe BE e SHBA – ideologjikisht ndjehet e lidhur me Putinin,” vlerëson gazeta duke shtuar: “Ai ndanë ambiciet e tij, dhe ëndërron për perandorinë serbomadhe”.

“Vuçiç e sheh Putinin si model”, citon Rheinische Post gazetarin gjerman Thomas Brey, i cili, më shumë se 40 vite raporton nga rajoni për Agjencinë gjermane të lajmeve DPA, e tani ka publikuar dhe studimin mbi ndikimin e mediave ruse në Serbi.

Sipas këtij studimi, thekson gazeta gjermane, mediat në Serbi të cilat i kontrollon Vuçiç plotësisht janë nën kthetrat e propagandës ruse, që nxiten nga agjencitë siç është Sputnik Serbia dhe RT Balkan (ish Russia Today).

“Para së gjithash televizionet – katër kombëtare, TV private, si dhe televizioni shtetëror RTS – gati pa përjashtim përhapin vizionin rus kur flitet për konfliktin në Ukrainë, por edhe kur bëhet fjalë për kontestimet ekonomike dhe gjeopolitike në mes të Moskës dhe Perëndimit.

Dy të tretat e popullsisë në Serbi rregullisht informohet nga këto burime. Edhe gazetat me tirazhin më të madh dhe portalet, të cilat me disa përjashtime janë miqë të afërt politik të presidentit të Serbisë, gjithashtu vlerësojnë zhvillimet politike globale nga këndvështrimi i Kremlinit,” shkruan Rheinische Post duke transmetuar vlerësimin e gazetarit Brey:

“Raportimi është agresiv, antiperëndimor dhe gati sa jep vetëm qëndrimet e Rusisë dhe Kinës.”

“Perëndimi përfundimisht duhet të zgjohet”

Mediat nën kontrollin e shtetit dhe ato që janë nën ndikimin e Rusisë theksojnë rolin e “viktimës sllave”, thekson Rheinische Post duke shtuar:

“Narracioni është që Perëndimi dëshiron që Rusia dhe aleatët e saj sllav të jenë të dobët ose dëshiron ti shkatërron fare, si dhe faktin që luftërat e Moskës në Ukrainë dhe luftërat e Serbisë në rajonin e populluar me bashkëvendas në Bosnje Hercegovinë dhe Kosovës janë akt i vetëmbrojtjes dhe vetëkonfirmimit. Bota Perëndimore po mbytet në moçalin e dekadencës, ku dominojnë pop-kultura e cilësisë së ulët, feminizmi jonatyral dhe ‘civilizimi global’, deri sa qëllimi i Rusisë është mbrojtja e vlerave sllave, kristiane dhe tradicionale. Në këtë ‘konflikt të civilizimit’ Perëndimi do të marrë fund.”

Mediat kryesore serbe publikojnë shumë rrëfime të këtij lloji, shkruan Rheinische Post, dhe shton:

“Ekzistojnë raporte se (ministrja e punëve të jashtme të Gjermanisë) Annalena Baerbock është ish-prostitutë, se Gjermania kërcënohet nga uria ose se dollari dhe sistemi financiar i SHBA janë pranë kolapsit. Sado që të jetë i ekzagjeruar indoktrinimi në Serbi, ai përfshinë popullësinë. Instituti i pavarur amerikan për hulumtimin e opinionit publik ka konfirmuar se dy të tretat e serbëve Perëndimin e sheh si nxitës lufte në konfliktin në Ukrainë. Gjysma prej tyre e sheh Moskën si partner politik, dhe vetëm 30 për qind dëshiron lidhje më të forta me shtetet e BE. Politikani më i popullarizuar i huaj është Putin, dhe i dyti renditet presidenti kinez Xi Jinping.”

Në fund, konkluzioni i gazetës gjermane është se Serbia është vend i vogël i cili nuk mund ta sfidoj seriozisht Perëndimin, por për ineteresa të Moskës mund ta pengoj politikën e BE në Ballkan dhe të mbjellë konflikte.

Rheinische Post jep dhe konkluzionin e Brey:

“Perëndimi më në fund duhet të zgjohet dhe të bëjë diçka për tu përballur me propagandën ruse në Serbi. Vetëm biznesi dhe diplomacia nuk ndihmojnë dot.”/DW/