“Rindërtimi i realitetit”, Rama: Me ose pa mua, PS në pushtet deri në vitin 2030!

Ndonëse dalja publike ishte dedikuar për Rindërtimin e shtëpive të dëmtuara nga tërmeti, proces për të cilin në mungesë transparence mund të flas vetëm Kryeministri Edi Rama, ky i fundit u mundua ta rindërtoi realitetin në Shqipëri të cilin e krijoi vetë dhe shqiptarët po vuajnë. Vetë nuk ka Program Qeverisës por kritikoi pa lidhje atë të Partisë Demokratike:

“Nuk ndodh të ulësh prodhimin e qumështit dhe të shtosh atë të djathit, kjo ndodh nëse e dynd qumështin me nisheste,” tha Edi Rama i bindur se me vizionin që ka, Partia Socialiste do të qëndroj në pushtet deri në vitin 2030.

“Nuk kemi tetë vite akoma, në qeveri e kemi filluar punën në fund të shtatorit të 2013-ës. Ditët, muajt dhe vitet tona janë të gjitha të mbushura me pune, kur të bëhen tetë do të bëhen më shumë punë se sa janë bërë deri më tani. Sa i përket programit e thash dhe e përsëris, është i qartë, i hapur, i ditur publikisht. Ne i kemi vendosur shtyllat, piketat, vazhdojmë të realizojmë ato që kemi thënë. Do të bëjmë publike një platformë me një program pune.

Jo një program do të ulim sigurimet shoqërore e do të rrisim pensionet. Kjo është që do të ulim prodhimin e qumështit dhe do të rrisim prodhimin e djathit. Kjo ndodh nëse e dynd atë qumësht me nisheste. Ja kjo është. Por do të jetë një plan pune, një vizion i Shqipërisë. Kjo nuk është e lidhur me mua, por deri në 2030 Partia Socialiste do të jetë në pushtet, me ose pa mua. Mos thoni obobo ky do të na bëhet gogol, kur themi 2030 është vizioni i Partisë Socialiste për 2030-ën,” tha Rama e pasi u bind se u përgjigj për Programin e PD vazhdoi me sulme ndaj Ambasadorëve që i kërkuan të largoj nga lista kriminelët ndërsa Ligjin e Dekriminalizimit që e miratoi edhe vetë e quajti maskaradë:

“Ambasadori britanik nuk e kuptoj pse është kaq i përfshirë në procesin e zgjedhjeve në Shqipëri. Meriton respekt por nuk e kuptoj pse është kaq i përfshirë kur vjen puna për zgjedhjet.

Unë nuk kam nevojë të ma thotë ambasadorja amerikane detyrën time. Kam shumë respekt për ambasadoren amerikane. Por mos ma nxirrni përpara ambasadoren amerikane ka thënë kështu apo ashtu. S’kam nevojë të ma kujtojë detyrën time asnjë ambasador, asnjë koordinator në PE. E di shumë mirë detyrën time karshi ligjit dhe karshi popullit shqiptar. Ligji është shumë i qartë, fare i qartë, kush ka bërë në të shkuarën 1,2,3,5,7 vepra penale për të cilat është dënuar duhet të mos kandidojë për një funksion publik. Madje unë e kam nxitur të shtohet në atë kohë dhe në administratën publike jo vetëm në politikë. Ligji bazohet mbi vetëdeklarimin e individëve dhe mbi kontrollin e vërtetësisë së deklarimit.

Nuk e kuptoj dot akoma në vitin 2020, 30 vjet pasi kemi zgjedhur një sistem të përgjegjësisë individuale para ligjit t’i kërkohet partive politike dhe kryetarëve të partive të mbajnë përgjegjësi pse njëri apo tjetri ka gënjyer”, tha Kryeministri duke e cilësuar Ligjin e Dekriminalizimit shkelje të të drejtave të njeriut dhe tha se kjo është arsyeja që asnjë parti nuk e ka çuar në Gjykatë Kushtetuese.

“Bota pas disa vitesh të konsideron të larë. Il fatto non esiste. Nuk ekziston sepse zgjedhja për demokraci është e drejta të gabosh pa u pushkatuar. Ne kemi bërë një ligj që e shkel këtë të drejtë themelore. Ndaj asnjë parti nuk e ka çuar në Gjykatë Kushtetuese sepse ky ka qenë kompromisi. Të jemi të qartë se u bë sikur jemi në malin Athos dhe bëjmë moral pa lidhje dhe kërkojmë llogari në adresa të gabuara. PS ka qenë e para që kur ka bërë listën e deputetëve kemi kërkuar dëshminë e penalitetit të të gjithëve. Dëshmia e penalitetit pas 5 vitesh që ke kryer një dënim është e bardhë. Me këtë ligj vetëdeklarimi vendos, ti deklaron që je i pastër dhe ndërkohë në moshën 11-vjeçare ti kë bërë një krim, 18 apo 20 e ca vjeç. Janë në analet e policive krime të së kaluarës, të gjykuara. Këtë proces nuk e bën dot partia, e bëjnë institucione të tjera. Në momente kur del x apo Y që ka gënjyer, ikën nga puna, ikën nga detyra dhe shkon e përballet me ligjin.”

Lidhjet me krimin dhe mafien nuk i cilësoi turp por akuzat që janë ngritur ndërsa maskaradë të gjithë situatën, përfshirë akuzat për lidhje me Ndranghetën.

“Turp i madh e bëmë këtë vend sikur çdo gjë ka mbrapa një pisllëk. E bëmë këtë vend vendin ku, në Itali bëhet një hetim dhe hetimi nxjerr se s’ka asnjë lidhje me Shqipërinë përveç një dyqani rrobash dhe PD gjen një blerje 44 mijë lekë kominoshe në atë dyqan dhe thotë ja prova e lidhjes me mafien. Kështu e bëmë këtë vend me kontributin tuaj që nuk i vumë një fre kësaj maskarade dhe gjithë këto shkojnë tek ata koordinatorët që s’duan t’ia dinë, por bëjnë politikë për punë të brendshme atje dhe ndihmojnë shokët e tyre.

Çfarë po më kërkon mua, ne do bëjmë të njëjtën gjë që kemi bërë as më shumë e as më pak dhe këtë nuk ka nevojë të ma thotë asnjë ambasador. Nuk ka qenë kurrë qëllimi të fusim nëpër lista njerëz që kanë pasur probleme me të shkuarën, por nuk kemi pasur informacion,” tha Edi Rama duke i dal më në fund nga goja edhe një e vërtetë:

Unë nuk jam ndonjë i mençur i madh, ka shumë më të mençur se unë, por deri këtu jo. Ka ligj ka dhe respekt për ligjin. Nuk janë përgjegjësia ime ata të cilët në një moment të caktuar abuzojnë me detyrën, me funksionin, me ligjin, me të tjerët. Është përgjegjësi individuale.”

Ndonëse e ka pranuar se nuk i beson sondazhet, shqetësimin që i kanë krijuar nuk e fshehut dot kur goditi fituesin e këtyre sondazheve për zgjedhjet e 25 Prillit. Dhe, në spektaklin e tij për rindërtimin e realitetit shqiptar sot Kryeministri Edi Rama u tha shqiptarëve se projekti i tij i përbashkët me Kryetarin e PD, Lulzim Basha, ishte çuarja për skrap e Lëvizjes Socialiste për Integrim, projekt të cilin Rama tha se Basha e tradhtoi.

“Çuarja për skrap e LSI-së, ishte një projekt i përbashkët me Lulzim Bashën, por i tradhtuar nga Basha. Se unë nuk e kam tradhtuar projektin, Lulzim Basha e ka tradhtuar projektin sepse ishte ai që e ndau me demokratët domosdoshmërinë për ta çuar LSI-në për skrap dhe sot është thjesht një aksioner në SHPK-në e katër ortakëve ku ai është ortak minorance, se ortakët kryesorë janë Saliu dhe Ilir Meta. LSI është projekt që duhet zhbërë, këtu nuk është çështje personash. Unë gjithmonë kam besuar se nuk janë njerëzit që korruptojnë sistemet, por sistemet korruptojnë njerëzit. Unë besoj që LSI-ja është një sistem që duhet çmontuar komplet. Kështu besoj, kam besuar dhe besoj.”

Sot, pa tepsi dhe kusi, kur e bëri të qartë se LSI mund të përfundoj në gjirin e PS, sërish nuk ka program por fjalët nuk i mungojnë duke folur për një platformë për Shqipërinë e vitit 2030

“Qytetarët e kanë shumë të thjeshtë, duhet të ballafaqojnë karakteret pastaj sigurisht dhe programet, pastaj çfarë është bërë dhe kush duhet të bëjë më shumë. Kjo fillon nga karakteri, nga karakteri i lidershipit, i forcës politike, nga karakteri i forcave politike.

Ne e kemi thënë me kohë që ne do të ndajmë me qytetarët një platformë për Shqipërinë e vitit 2030 sepse praktikisht jemi në kushtet kur nuk mund të flasim me qyt për thjesht një program elektoral për të marrë punët e vendit por do të flasim për një vizion dhe ecuritë e punëve në vend dhe për të ndarë me qytetarët bindjen tonë se vetëm ne jemi në gjendje që qytetarët duan, të gjithë duam. Së shpejti besoj do kemi mundësi ta ndajmë këtë vizion me qytetarët”