Rishikimi i buxhetit 2020, rritet ngarkesa tatimore në 4-mujorin e fundit

Pandemia COVID-19 me krizën ekonomike, që krijoi, ka dëmtuar rëndë arkëtimet buxhetore në katërmujorin e parë të vitit 2020, duke e detyruar qeverinë që të rishikojë shumë herë buxhetin për ta përshtatur atë me zhvillimet e reja.

Ministria e Financave në rishpërndarjen e re buxhetore të treguesve te të ardhurave ka ulur planin e arkëtimeve mujore nga prilli deri në gusht në raport me buxhetin fillestar, por në muajt nga shtatori deri në dhjetor plani i të ardhurave mujore rritet me shumë se, buxheti fillestar.

Sipas azhurnimit më të fundit të Ministrisë së financave plani i të ardhurave është shkurtuar me 20 miliardë në krahasim me buxhetin fillestar.

Në muajin maj financat presin të arkëtojnë 7,2 miliardë lekë më pak se buxheti fillestar, me një rënie 17 për qind në raport me planin e fillim vitit. Gjithashtu rënia e të ardhurave në raport me parashikimin fillestar do të jetë – 2,5 % në qershor, -1,9 në korrik dhe -1.8 për qind në gusht (sipas grafikut bashkëngjitur).

Por pavarësisht efekteve negative që ka dhënë kriza ekonomike, qeveria parashikon të arkëtojë gjatë periudhës gusht- shtator 2020 më shumë të ardhura se në buxhetin fillestar.

Sipas të dhënave zyrtare në shtator do të grumbullohen 41,9 miliardë me një rritje 4.3 për qind në raport me buxhetin fillestar.  Në muajin tetor plani i të ardhurave buxhetore është 45,6 miliardë lekë ose 2.2 për qind më i lartë se plani fillestar, në tetor bizneset do të paguajnë 4,5 miliardë lekë më shumë se programi fillestar apo 10 % më shumë, ndërsa në dhjetor do të paguajnë 4 % më shumë me një total prej 51,8 miliardë lekësh.

Me këto programime Ministria e Financave parashikon përshpejtim të ekonomisë në tremujorin e fundit me ritme më të larta se para krizës Covid.

Rënie e ndjeshme e të ardhurave për 4 mujor

Të dhënat paraprake të Ministrisë së Financave bëjnë të ditur se të ardhurat buxhetore në prill ranë me 30% në raport me të njëjtën peruidhë të një viti më parë, të ndikuara nga të gjitha zërat, ku efektin kryesor e dhanë TVSH-ja, tatim fitimi, taksat nacionale dhe ato të pushtetit vendor.

Për 4-mujorin,  të ardhurat janë tkurrur me 11%, të ndikuara nga performance e dobët e marsit dhe sidomos prillit, ndërsa për dy mujorin kishin rezultuar në një terren pozitiv. Në vlerë absolute, për 4-mujorin në buxhet janë mbledhur 16 miliardë lekë më pak, ose 132 milionë euro më pak, 75% e së cilës ka ardhur vetëm nga muaji prill./Monitor/