Rivarrimi i dëshmorëve, Haradinaj: Marre për ata që pengojnë rrugën Deçan-Plavë!
Në 23 vjetorin e rënies, sot u bë rivarrimi i dëshmorëve të kombit Besart Kadrijaj dhe Shkëlzen Berisha pranë bashkëluftëtarëve të tyre në Kompleksin Memorial në Gllogjan, ku Ish-komandanti i Zonës Operative të Dukagjinit, kryetari i AAK-së, Ramush Haradinaj, e konsideroi si një obligim ndaj atyre që ranë në mbrojtje të kufirit shqiptaro-shqiptar.
Me këtë rast, Haradinaj akuzoi ata që nuk po financojnë përfundimin e rrugës Deçan-Plavë duke shtuar se populli do t’i mallkojë ata që nuk lejojnë afrimin e shqiptarëve.
“Është një ditë ndryshe sepse pas kaq vitesh po bashkohemi duke kryer obligimin e të rënëve për liri, në rivarrosjen e të rënëve që kanë rënë në kufirin shqiptaro-shqiptar. Misioni jonë i afrimit shkon më përpara në rrugën për Plavë. Marre atyre që nuk i heqin paret për këtë projekt e nuk po e lënë me krye rrugën për në Plavë, mos bëni shkelje, iu mallkon populli për këto shkelje,” tha Hadarinaj ndërsa Kryetari i komunës Deçan, Bashkim Ramosaj, tha se edhe si shumë vjet më parë Shkelzeni dhe Besarti po na bëjnë bashkë e institucionet ende janë borxhli ndaj tyre.
“Shkëlzeni dhe Besarti na kanë bashku edhe sot. E kom pa një madhështi ditën e zhvarrosjes dhe falënderoj Tahir Gjonbalajn. Në këtë rrugëtim prapë jemi borxhli atij vendi. Lavdi dëshmorëve të kombit Shkëlzenit e Besartit”.
Në emër të familjarëve, Faton Mehmetaj ka falënderuar Ramosajn e Hardinajn që mundësuan kthimin e dëshmorëve nga Vuthaj në Kompleksin Memorial në Gllogjan.
“Jemi mirënjohës kryetarit të komunës dhe komandantit Ramush Haradinaj. E kemi një detyrim për familjen e Vuthajve që varrosën Besartin dhe Shkëlzenin në kohë lufte dhe për 20 vjet u përkujdesën për varreza të tyre”.
Kurse nëna e Besart Berishës, Fana Berisha, tha se për të është e vështirë që pas 23 vjetësh ta rivarros djalin më të madh, duke shtuar se shpreson që gjeratat e reja ta gëzojnë lirinë.
“E vështirë është boll, po masi i ktheva në vend të vet e falënderoj Vuthajn që 23 vjet na i kanë këqyr. Ma të parin fëmijë me varros koka shumë e rëndë. I ri maturant po çka me bo. Ishallah tash e mas e gëzojnë këta tjerët”.
