Romë, betohet qeveria me kryeministër Mario Draghi
Kryeministri Mario Draghi dhe kabineti i tij qeverisës, u betuan sot para presidentit të Republikës së Italisë, Sergio Mattarella.
Ish-shefi i Bankës Qendrore Europiane do ta drejtojë Italinë për të dalë nga kriza e pandemisë me një kabinet qeveritar me bazë të gjerë të pazakontë deri tani.
Mbrëmë Mario Draghi gjatë takimit me presidentin Sergio Mattarella në Romë pranoi përfundimisht mandatin për krijimin e qeverisë pas dhjetë ditë konsultimesh me partitë. Më pas ai doli shkurt përpara gazetarëve në pallatin Quirinale, selia e presidencës. Në konferencën e shtypit ai lexoi listën me emrat e ministrave të planiifkuar. Lidhur me programin qeveritar ai nuk tha asgjë dhe pritet ta bëjë tani pas betimit.
Qeveria e 67 e Republikës Italiane
Ekipi i ministrave të ekonomistit 73 vjeçarit përbëhet nga figura të njohura, si dhe nga politikanë e ekspertë. Politikani Lëvizjes Pesë Yjet Luigi Di Maio do të vazhdojë të mbajë postin e ministrit të Jashtëm dhe Roberto Speranza në kulmin e pandemisë së koronavirusit mbetet ministër i Shëndetësisë. Ministrinë e Ekonomisë do ta drejtojë Daniele Franco, drejtor i përgjithshëm i Bankës Italiane të Rezervave.
Ekspertja Marta Cartabia sipas planit të Draghit do të jetë ministre e Drejtësisë. Cartabia deri në shtator 2020 ka qenë presidente e Gjykatës Kushtetuese. Ministria mjaft e diskutuar më parë për Rindërtim ekologjik do të drejtohet po ashtu nga një ekspert, nga fizikanti Roberto Cingolani. Në kabinetin e Draghit ka më shumë politikanë se sa ekspertë.
Qeveri “me profil të lartë”
Kabineti i Draghit sot u betua në mesditë.
Presidenti Mattarella pas dorëheqjes së Contes mandatoi me krijimin e qeverisë së re Draghin, i cili deri më sot nuk ka pasur post politik. Fillimisht Draghi e pranoi mandatin me rezervë. Presidenti kërkooi një qeveri “me profil të lartë”, që ta drejtojë Italinë për të dalë nga kriza.
Qeveria e deritanishme e qendrës së majtë nën juristin e paparti Giuseppe Conte, raporton DW, dështoi përpara një jave në grindjen mbi përdorimin e mbi 200 miliardë Eurove të ndihmave të BE-së për krizën e koronavirusit.
