Ronaldo: Dua t’i tregoj italianëve nivelin tim

Cristiano Ronaldo, prezantohet te Juventus. Ylli portugez është pritur në mënyrë madhështore dhe ka synime të jashtëzakonshme me “Zonjën e Vjetër”. Ai pas disa vitesh u largua nga Real Madrid, skuadër me të cilën ka fituar 4 Champions League (tri herë rresht).

Në konferencën për shtyp, Ronaldo tregoi se për se e zgjodhi Juven: “Pyetje e lehtë për të dhënë përgjigje, Juventusi është një nga klubet më të mirë në botë.

Miqtë dhe kolegët e mi më thanë se është një klub ku mund të luaja. Duke parë madhështinë e këtij klubi, nuk ishte një vendim i vështirë për ta marrë”, tha Ronaldo.

Ai pranon se gjithmonë i kanë pëlqyer sfidat.

“Unë jam një person që pëlqen të mendoj për të tashmen. Jam ende i ri dhe gjithmonë më kanë pëlqyer sfidat, që nga Sportingu, te Manchester Utd dhe tani tek Juventusi. Kjo është një sfidë, dhe tani jam i mirëpërgatitur”.

Tifozët e Realit janë të mërzitur, mesazhi yt për ta? “Historia e Realit është brilante. Falënderoj tifozët, por tani dua të shoh drejt kësaj faze të re në jetën time.

“Mezi po pres të luaj me Juven. Jam shumë i motivuar dhe dua t’i tregoj italianëve nivelin tim. Dua të lë shenjë në historinë e Juventusit. Jam shumë i lumtur për këtë sfidë”.

Sa i përket Serie A, portugezi tha “një kampionat shumë i vështirë, dhe shumë taktik. Karriera ime nuk ka pasur ndonjë gjë të lehtë, dhe mua nuk më pëlqen kur i kam gjërat e lehta. Kam shumë besim tek vetja, tek shokët e ekipit dhe tek klubi”.

Juve ka vite që synon Champions League, por dot nuk e arrin, ndërsa Ronaldo është optimistë. “Është një trofe që të gjithë duan ta fitojnë, por është shumë e vështirë. Juventusi u afrua ta fitonte, por në fund finalet janë gjithmonë të paparashikueshme. Për këtë, shpresoj t’i sjell fat. Do luftojmë të gjithë për trofetë”, shprehet pesë herë fituesi i “Topit të Artë”.

Ai flet për ‘Topin e Artë: “Juventusi më ka dhënë një mundësi të madhe. Është një hap përpara në karrierën time. Nuk është koincidencë që ka fituar 7 titujt e fundit në Itali. Ndihem i nderuar që Juvja mendoi të më merrte mua. Dhe dua ta çoj në nivel edhe më të lartë. ‘Topi i Artë’ nuk është diçka që e kam në plan të parë. Gjithmonë dua të fitoj dhe të jem më i miri. Nëse gjërat shkojnë mirë, sigurisht që do kem rast ta fitoj. Por, nuk është diçka aq e rëndësishme sa më lë pa gjumë”.