Rreziku nga Serbia e Madhe, Bytyçi: Kryeministri Rama, palë me Serbinë kundër Kosovës!
Paralajmërimet, deklaratat e liderëve shqiptarë, serb dhe ndërkombëtar, dhe alarmin mbi rrezikun e Serbisë së Madhe, Prof.Asoc.Dr.Enevr Bytyçi i sjell në një libër “Kosova e rrezikuar nga Serbia e Madhe”, sot kur Kryeministri Edi Rama është bërë palë me Serbinë kundër Kosovës.
I pranishëm në ceremoninë e promovimit të këtij libri, Ish-Presidenti Sali Berisha, tha sot ajo që shohim ne është tradhtia e dytë e madhe e Tiranës ndaj Kosovës.
“Kemi të bëjmë me tradhtinë e dytë të madhe. Në botë lufta e ftohtë falë Ronald Reagan dhe Mihail Gorbacov mori fund në 1980. Dhe u sanksionua. Sot në botë ka vetëm një luftë të ftohtë, që një kryetradhëtar tjetër, një Jorgo Zograf i dytë që e ka emrin Edvin, i ka shpallur udhëheqjes shqiptare të Prishtinës, jo argates, i ka shpallur kryeministrit të saj për fajin e vetëm se ai po mbron me vendosmëri etike çdo të drejtë që ne si shqiptarë kemi në Kosovë.”
Ish-Presidenti i Kosovës, Fatmir Sejdiu, duke folur si njëri ndër protagonistët kryesor të dialogut për përcaktimin e statusit të Kosovës, tha se sot nuk duhet pranuar fakti që shumë vende e quajnë çështje të pa mbyllur pavarësinë e Kosovës, duhet të dialogohet por Serbia e Madhe mbetet një projekt i rrezikshëm.
“Vendet e tjera aleate të Republikës së Serbisë siç është Federata Ruse dhe ndonjë vend tjetër pavarësisht se mund të ketë qenë neutrale si Kina, praktikisht janë parë si model i mosngutjes së tyre, por paralelisht edhe i nxitjes për të pasur procese retograde që do të dëmtonin Kosovën.”
Profesori, publicisti dhe autori i librit, Prof.Asoc.Dr.Enver Bytyçi, pas parashikimeve dhe paralajmërimeve që publikoi dhe rezultuan të sakta lidhur me rrezikun dhe të ardhmen e Kosovës, duke përmbyllur edhe idenë e këtij rreziku që është shtjelluar në libër nga Serbia e Madhe, tha sot se Kosova është në rrezik edhe për faktin që Kryeministri Edi Rama është bërë palë me Serbinë kundër Kosovës.
“Fillimisht Kryeministri i Shqipërisë u bë palë për të përfaqësuar Kosovën në raport me Serbinë, sot pas 6 vitesh ka përfunduar palë me Serbinë kundër Kosovës.”
Në ceremoninë e promovimit të librit “Kosova e rrezikuar nga Serbia e Madhe”, i cili për lexuesin vjen në gjuhën shqipe dhe angleze, morën pjesë intelektual të njohur të jetës publike shqiptare dhe diplomatë të huaj, studiues dhe bashkëpunëtorë të profesor Enver Bytyçit.
