Rrëzohet helikopteri në Ukrainë, humb jetën ministri i Brendshëm dhe 17 të tjerë

Të paktën 18 persona kanë humbur jetën sot, përfshirë ministrin e Brendshëm të Ukrainës dhe tre fëmijë, pas përplasjes së një helikopteri pranë një kopshti të fëmijëve në periferi të Kievit.

Sipas shefit të Policisë Kombëtare të Ukrainës, Ihor Klymenkos, nëntë nga viktimat ishin në bordin e helikopterit.

Shkaku i incidentit, raporton RFE, nuk dihet ende.

Ai ndodhi në kohën kur forcat ruse vazhdojnë përpjekjet e tyre sulmuese në qytetin e Bahmutit, në rajonin lindor të Donjeckut.

Kievi, ndërkohë, u kërkoi përsëri aleatëve të tij perëndimorë që të përshpejtojnë miratimin e dërgimit të armatimit më të avancuar, duke përfshirë tanke moderne.

Ministri i Brendshëm ukrainas, Denys Monastyrsky, raporton RFE, ishte një nga personat në bord të helikopterit. Zëvendësi i tij, Yevgeniy Yenin, dhe Sekretari i shtetit, Yurii Lubkovych, gjithashtu humbën jetën në incident.

Bëhet e ditur se janë edhe 29 persona të plagosur, mes tyre 15 fëmijë.

Guvernatori rajonal i Kievit, Oleksiy Kuleba, tha se “në momentin e tragjedisë kanë qenë të pranishëm fëmijë dhe punonjës të kopshtit”.

Kuleba shtoi se ka njerëz të lënduar, por nuk dha detaje tjera.

Ekipet mjekësore, policia dhe zjarrfikësit, janë në vendin e ngjarjes, shtoi ai.