Rritja e rasteve me koronavirus, Dr.Spahia: Fajin nuk e kanë fasoneritë por Edi Rama!
Ish-Deputeti i Partisë Demokratike dhe mjeku Bardh Spahia e konsideron të pacipë hedhjen e fajit tek qytetarët nga Ogerta Manastirliu, për numrin e rritur për të dytën ditë radhazi, të infektuarve me COVID-19.
“E pra sipas vetë të dhënave zyrtare, janë punonjës e kontakte të fasonerive. Dhe është krejt e qartë se ka vetëm një përgjegjës për infektimin dhe përhapjen nga fasoneritë! Ai është Edi Rama e jo qytetarët,” thekson Bardh Spahia duke shtuar se për shkak të natyrës së punës në fasoneri, është e pamundur shmangia e kontaktit me të tjerët!
“Edi Rama nuk i mbylli fasoneritë, që të mos u paguante pagesën minimale punonjësve të tyre. Në vend që t’ua jepte 70 mijë punonjësve kryesisht vajza e gra, i çoi paratë për koncesione e për një grusht oligarkësh pranë tij,” tha Ish-Deputeti i Partisë në reagimin e tij përmes rrjetit social Facebook duke përfudnuar:
“Rritja e rasteve të të infektuarve nuk ka të bëjë me hapjen e ekonomisë, por me dështimin spektakolar të qeverisë për të testuar qytetarët e ekspozuar ndaj rrezikut.”
Pas përditësimit të dhënave për 24 orëve të fundit nga Ministria e Shëndetësisë nga ISHP, sot ishte prezente edhe ministrja Ogerta Manastirliu e cila kishte ardhur për të këcënuar qytetarët nëse do të vazhdohet me tendencën përkeqësuese të ditëve të fundit, sipas saj sot dhe paralajmrimit të djeshëm të shefit të saj, Edi Rama, do të jenë të detyruar të bëjnë hapa pas.
