Rruga e Arbrit, Rama: Do të jetë e aksesueshme brenda verës të vitit 2021
Rruga e Arbrit një nga akset e dhëna për ndërtim me partneritet publik privat pjesë e paketës “1 miliardë euro” do të jetë e aksesueshme brenda verës të vitit 2021.
Detajet për punimet te Ura e Brarit- dalja e tunelit të Murrizit dhe asfaltimin e segmentit 3 në rrugën e Arbrit i dha sot kryeministri Edi Rama nëpërmjet një video të publikuar në rrjetet sociale. “Brenda muajit do të asfaltohen 10 km e para. 500 punonjës dhe mbi 200 mjete të tonazhit të rëndë janë angazhuar në proces. Rruga pritet të jetë e aksesueshme brenda verës të 2021”, tha Rama.
Kostoja e Rrugës sipas kontratës të miratuar në mars të 2018 nga Këshilli i Ministrave ishte 33,6 miliardë lekë (40 mld lekë ishte vlera e kontratës me TVSH) për financimin e 41 km rrugë të kategorisë C, ku 26 km do të bëheshin nga e para dhe 15 km të tjera do të ndërtohen pjesërisht. Ministria e Financave në vitin 2019 riprogramoi për buxhetin e ri, financimin e rrugës me 58 miliardë lekë. Rritja e shumës do të shkonte për kompensimin e shembjes të rrugës të shkaktuar nga punimet për hapjen e tunelit të Murrizit.
Sipas projektit rruga ka si pjesë përbërëse Tunelin e Murrizit, me gjatësi 3.2 kilometra, por edhe pesë tunele të tjera të vogla do të ndërtohen për të shmangur kthesat, si dhe katër ura. Gjatësia e aksit që nis në Tiranë dhe përfundon në Bllatë, sipas studimit të fizibilitetit do të jetë afërsisht 73.5 km. Ndërtimi pritet që të shkurtojë distancën mes Tiranës dhe Dibrës, me të paktën 40 minuta.
Duke pasur parasysh terrenin dhe mënyrën sesi është konceptuar projekti, rruga kategorizohet si C2 dhe është projektuar me shpejtësi minimale 60 km/orë dhe maksimale 100 km/orë.
Kontrata parashikon që punimet të përfundojnë për 44 muaj, çka përkon me fundin e vitit 2021. Edhe pas përfundimit të punimeve, kompania nuk do ta dorëzojë rrugën, por do të vijojë të kryejë operimin dhe mirëmbajtjen gjatë viteve të koncesionit, ndërkohë që qeveria është angazhuar që të paguajë kompaninë për një afat./Monitor/
