Saimir Tahiri lirohet nga burgu, Kim: Ata që ndihmojnë miqtë e fuqishëm, do të kenë pasoja

Ambasadorja e SHBA në Tiranë, Yuri Kim, shprehet e zhgënjyer pas lirimit nga burgu të Ish-Ministrit të Brendshë, Saimir Tahirit, duke i cilësuar mënyra të vjetra të mosndëshkimit dhe privilegjimit për disa vazhdojnë në sistemin e drejtësisë.

“Shumë zhgënjyese të shohësh se mënyrat e vjetra të mosndëshkimit dhe privilegjimit për disa vazhdojnë në sistemin e drejtësisë në Shqipëri,” shprehet Ambasadorja amerikane në Shqipëri në reagimin e saj përmes rrjetit social Twitter duke shtuar:

“Këto mënyra të vjetra nuk janë të përshtatshme për një aleat të NATO-s dhe aspirant të BE-së dhe ato duhet të refuzohen me vendosmëri. SHBA konsideron korrupsionin kërcënim thelbësor të sigurisë kombëtare.”

Në fund, Ambasadorja e SHBA në Tiranë, Yuri Kim, ka dhe një mesazh për të gjithë ata gjyqtarë e prokurorë, si në rastin e Saimir Tahirit, që kanë guximin të marrin vendime të këtij lloji dhe janë pjesë e drejtësisë së reformuar:

“Ata që janë të përfshirë në bërjen ose pranimin e kërcënimeve dhe nxitjeve – për shembull, për të ndihmuar miqtë e fuqishëm – duhet të kuptojnë se veprimet e tyre do të kenë pasoja.”

Ndryshe, sot Gjykata e Elbasanit e kanë lënë të lirë Ish-Ministrin e Brendshëm, Saimir Tahiri, që ishte dhe simboli i Reformën së sukseshme në Drejtësi, me arsyetimin se ka gruan e sëmurë dhe kishte sjellje të mirë ndonëse i kanë mbetur 20 muaj nga 40 muaj sa ishte dënuar.