Samiti Diasporës, Presidentja e Kosovës: Shqiptarët në Luginën e Preshevës po përballen me spastrim etnik!

 Duke vlerësuar mërgatën shqiptare që ishte si burim i forcës drejt lirisë e demokracisë, Presidentja e Kosovës, Vjosa Osmani, në Samitin e Diasporës në Tiranë, çmoi kontributin e tyre në kohën e luftës në Kosovë si dhe rolin që kishte si një urë lidhëse mes shteteve.

“Mërgata shqiptare është shtylla e lëvizjes kombëtare për liri e pavarësi të shqiptarëve. Solidariteti dhe mbështetja e tyre e palëkundur ka qenë burim force për ne, në rrugëtimin tonë drejt lirisë, pavarësisë e demokracisë. Në vitet e 80-ta e 90-ta, mërgata jonë ishte zëri ynë në të gjitha qendrat e vendimmarrjes, nga Washingtoni në Bruksel, nga Berlini në Paris e Romë e shumë vende të tjera,” tha Vjosa Osmani ndërsa u ndal edhe te shqiptarët e Luginës në Preshevës, të cilët aktualisht po përballen me diskriminim dhe spastrim etnik nëpërmjet mjeteve administrative.

“Përderisa jemi mbledhur sot të gjithë këtu, mos të harrojmë se vëllezërit tonë në Medvegjë, Preshevë dhe Bujanovc ende po përballen me diskriminim etnik dhe përballen me spastrim etnik nëpërmjet mjeteve administrative,” tha Presidentja e Kosovës, Vjosa Osmani duke përfunduar:

“Sot iu them nga këtu: ju nuk jeni vetëm. Ne jemi me ju për mbrojtjen e të drejtave tuaja.”