Samiti i Diasporës, Ali Ahmeti: Europa s’mund të jetë më e qetë pa Shqipërinë, Kosovën, Maqedoninë V. e Malin e Zi 

Kryetari i BDI-së, Ali Ahmeti bëri thirrje për bashkëpunim mes shqiptarëve, ndërsa nga Samiti i tretë i Diasporës në Tiranë iu drejtua Kryeministrit Edi Rama që të ngrejë edhe më shumë zërin për çështjen e integrimit, duke i bërë të qartë se Kosovën, Maqedoninë e Veriut dhe Malin e Zi i ka përkrahë.

“Luftërat i fituam, edhe politikisht edhe ushtarakisht, dhe diplomatikisht. Sot kemi një luftë të re dhe më të fortë. Të bëjmë të begatë atdheun tonë, të organizohemi edhe më shumë. Këtë mundësi e ka mërgata.

Të gjithë të rinjtë le të kapin mundësitë në universitetet më të mira të botës, dhe t’i kthehen kokëplotë atdheut të tyre,” tha Ali Ahmeti duke përfunduar:

“Sot vendet tona mund t’i kemi vende të BE, siç jemi në NATO. Edhe Europa nuk mund të jetë e qetë pa Shqipërinë, Kosovën, Malin e Zi dhe Maqedoninë e Veriut. Djepi i Europës është Mesdheu, por duhet punuar me përkushtim.”