Sanksionet e Edi Ramës! Çfarë pas tradhtisë komuniste të radhës në Gjakovë?!
Askush nuk mund të thotë se ishte i pritshëm vendimi i Kryeministrit Edi Ramës për të anuluar mbledhjen e përbashkët të dy qeverive Shqipëri-Kosovë që ishte parashikuar për sot në Gjakovë; Aq më shumë, askush nuk mund të thotë se ishte i pritshëm ky anulim si sanksioni i parë i Bashkimit Evropiat kundër Kosovës, për shkak të mosreagimit të Kryeministrit Albin Kurti, për situatën e krijuar në veri të Kosovës!
Por, askush nuk mund të thotë se ky vendim i Edi Ramës nuk shkaktoi pasoja të pariparueshme si në politikën e brendshme kosovare ashtu dhe marrëdhëniet e Kryeministrit Albin Kurti dhe Kosovës me ndërkombëtarët!
Jo pse qytetarët e Kosovës dhe Shqipërisë dëmtohen me mosnënshkrimin e sotëm të 13 marrëveshjeve për të cilat u tha se kanë për synim t’i afrojnë ekonomitë, sistemete drejtësisë, arsimit, kulturës, etj.
Jo pse kryetari i LDK, Lumir Abdixhiku “mbeti pa Shqipërinë”!
Jo pse kryetari duke u kthyer i PD me vulë dhe shtet, Lulzim Basha, miraton në heshtje veprimin e Edi Ramës ndaj Kosovës!
Jo pse këtë vendim të Edi Ramës e mbështeti Beogradi zyrtar!
Jo pse Edi Rama e bëri të qartë sërish se është me Serbinë dhe Kosovën!
Jo pse veprimet e Edi Ramës janë në sinkron me shefin e diplomacisë evropiane, Josep Borrell!
Jo pse veprimet e Edi Ramës i konfirmojnë si të duhura batonët dhe buzhalët ndërsa e konsiderojnë të çmendur Albin Kurtin!
Dhe, jo sepse Albin Kurti hodhi poshtë Draftin e Statutit të Asociacionit të komunave me shumicë serbe të cilin e hartoi Edi Rama dhe i dërgoi kancelarive kryesore evropiane, Berlin, Paris dhe Bruksel!
Por, sepse Edi Rama është Kryeministër i cili vjen nga radhët e partisë komuniste shqiptare, PS, dhe konfirmoi se nuk do të bëjë asgjë ndryshe ndaj Kosovës, vetëm ashtu siç veproi paraardhësi i tij Enver Hoxha i cili qeverisi me moton “vëllezërit jugosllavë dhe miqtë kosovarë”!
Sepse Edi Rama anuloi nënshkrimin e 13 marrëveshjeve me Kosovën në Gjakovë ashtu siç anuloi Enver Hoxha vendimet e Konferencës së Bujanit edhe pse ishin miratuar në prezencë të dërguarëve të Partisë Komuniste të Jugosllavisë, dhe vetëm një ditë më vonë alarmuan Beogradin zyrtar kur e kuptuan se i njihej Kosovës e drejta për vetëvendosje!
Sepse Edi Rama vështirësoi lëvizjen e shqiptarëve të Kosovës drejt Shqipërisë dhe anasjelltas duke e bërë edhe me lekë Rrugën e Kombit, rrugë të cilën Enver Hoxha nuk e ndërtonte me pretekstin se “mund të vijnë forcat jugosllave më shpejtë në Tiranë”!
Sepse Edi Rama vështirëson rrugën euroatlantike të Kosovës dhe i vendos sanksione ndërsa bënë avokatinë e Serbisë edhe kur ajo kundërshton Rusinë, ashtu siç bëri Enver Hoxha me Jugosllavinë kur e propozoi për anëtarësim në OKB!
Sepse Edi Rama bëhet keq kur Albin Kurti i thotë jo bashkësisë euroatlantike dhe lufton krimin, por nuk e pengon kur Presidenti i Serbisë, Aleksandar Vuçiç, i thotë jo po kësaj bashkësie euroatlantike dhe mbështetë krimin e Rusis dhe Vladimir Putinit në Ukrainë!
Sepse Edi Rama bashkohet me Presidentin e Serbisë, Aleksandar Vuçiç për të themeluar “Ballkanin e Hapur” duke vlerësuar vlerat e tij integruese dhe asnjërën nga vlerat e Vuçiçit nuk i zbaton, siç është ajo më kryesore, respektimi i të gjithë serbëve jashtë kufijve të Serbisë; Për të respektuar të paktën shqiptarët që janë dënuar nga Serbia e Vuçiçit të jetojnë në pes shtete të Ballkanit!
Sepse Edi Rama thotë se dështoi të bind Albin Kurtin për të respektuar ndërkombëtarët dhe të njejtën gjë nuk e thotë për Vuçiçin i cili shkakton trazira në veri dhe nuk i lejon serbët lokal të marrin pjesë në zgjedhje, kur Kryeministri Rama edhe publikisht tha se është kundër çdo bojkotimi të zgjedhjeve dhe mbështet organizimin e tyre!
Sepse Edi Rama shqetësohet për mosbindjen ndaj ndërkombëtarëve dhe i vendos sanksione Albin Kurtit dhe Kosovës, por këtë nuk e bënë për Aleksandar Vuçiçin, Milorad Dodikun dhe Republikën Srpska që kundërshtojnë Përfaqësuesin e Lartë të BE në Bosnje Hercegovinë dhe e kërcënojnë me shkëputje dhe bashkim me Serbinë! Madje nuk dëgjoi njeri Edi Ramën kur këtë e konfirmoi Milorad Dodik edhe në prezencë të Presidentit të Serbisë vetëm 60 ditë më parë në Beograd!
Në fund, shqiptarët kudo që jetojnë, sot duhet të jenë më të përgatitur pas këtyre sanksioneve që vendosi Kryeministri i Shqipërisë, Edi Rama, ndaj Kosovës jo pse kemi të bëjmë me tradhtinë e radhës të komunistëve shqiptarë, por, sepse ky njeri i rrezikshëm që sot kryeson qeverinë shqiptare, në emër të qetësisë dhe stabilitetit të rajonit, po e rikthen në tryezën e bisedimeve, ndarjen e Kosovës!
Asaj pjese ku batonët dhe buzhalët po proklamojnë se jetojnë 98% e shqiptarëve dhe ata nuk duan të jetojnë me shqiptarët në Kosovë, ndërsa duan që shqiptarët të heshtin pavarësisht se janë dëbuar nga veriu i Kosovës!
Në tryezën ku ndërkombëtarët së bashku me Edi Ramën sugjerojnë të mos përfillen më gjithë kompromiset shumë të dhimbshme që kanë bërë shqiptarët, duke pranuar Planin e Ahtisarit!
