Sarajevë, Dodik paralajmëron shkëputjen e Republikës Srpska
Kryesuesi i Presidencës së Bosnje Hercegovinës, Milorad Dodik duke shprehur paknaqësinë për situatën në vendin të cilin e udhëheqë, kërcënoi me shpalljen e pavarësisë së Republikës Srpska, nëse gjërat nuk ndryshojnë.
“Unë në të ardhmen nuk mund ta përjashtoj çfarëdo lloj lëvizje, e madje as shpalljen e pavarësisë së Republikës Srpska. Pavarësisht se në çfarë konteksti përdoret mendoj se kjo është gjëja më racionale,” tha Dodik në një intervistë për televizionin publik, BHT.
Duke folur për gjendjen në Bosnje Hercegovinë, ku edhe gjashtë muaj pas zgjedhjeve ende nuk është krijuar Këshilli i ri i Ministrave, ai e përshkuan si “uzurpim të të drejtave ligjore” duke e fajësuar elitën politike boshnjake, përkatësisht Kryetarin e partisë SDA, Bakir Izetbegoviç.
Akuzon të gjithë
Serbi Milorad Dodik ashtu sikur se shefi i tij në Beograd, Aleksandar Vuçiç, të gjithë i fajëson dhe vetëm ai është i pafajshëm. Me këtë rast ai tha se Izetbegoviç përkatësisht SDA vazhdimisht po kërkojnë kushte te reja për krijimin e Këshillit të Ministrave ndonëse kjo nuk qëndron sepse është formula e qartë për krijimin e Këshillit të Ministrave.
Bosnje Hercegovina ka nëntë ministra të cilët ndahen në tri kouta etnike, dhe Këshilli i Ministrave përbëhet me nga tre boshnjak, kroatë dhe serbë ndërsa Kryetari i Këshillit të Ministrave ndërrohet në bazë të etnisë, në çdo mandat. Këtë radhë i takon që Kryetar i Këshillit të Ministrave të jetë serb, e Dodik për këtë post e ka përcaktuar Zorana Tegeltiën, Ish-Ministrin e financave në Qeverinë e Republikës Srpska.
Por Dodik kështu e interpreton bllokimn e krijimit të Qeverisë:
“Izetbegoviç kërkon nga pala serbe që përveç kryesuesit të kemi vetëm dy ministra, sepse po futet Zhelko Komshiç.”
Ndërsa duke komentuar vendimin Gjykatës Kushtetuese të Bosnje Hercegovinës për shpalljen e paligjshme të, 9 Janarit Ditës së Republikës Srpska, ai akuzoi këtë Gjykatë duke e quajtur “strukturë mashtruesish” e cila punon vetëm në bazë të ndikimit të jashtëm përkatësisht Zyrës së Përfaqësuesit të Lartë, OHR, dhe Ambasadave të shteteve të fuqishme.
Ndryshe, ky është kërcënimi i radhës i Milorad Dodikut me Republikën Srpska në kohën kur Presidenti i Serbisë, Aleksandar Vuçiç, po mundohet të shkëputë ndonjë pjesë të tokës së Kosovës në momentet kur Dialogu Kosovë-Serbi i ka orët e numëruara. Ose, siç thonë shumë analistë, Vuçiç po shkon drejtë bashkimit të Republikës Srpska, nëse i dështojnë planet në Kosovë.
