Seanca plenare/ Miratohet Protokolli i Maqedonisë së Veriut në NATO, minoritarët grek kundër…

Me 130 vota për, Parlamenti i Shqipërisë ratifikoi Protokollin e Traktatit të Atlantikut Verior për aderimin e Republikës së Maqedonisë së Veriut, miratim për të cilin kryetari i Parlamentit të Maqedonisë së Veriut, Talat Xhaferi, prezent në këtë seancë plenare, duke shprehur mirënjohje tha se Shqipëria është mbështetësi ynë i fortë në të gjithë nismat rajonale dhe ndërkombëtare.

“Ju drejtohem në emrin tim dhe deputetëve në Maqedoninë e veriut të shpreh mirënjohjen që na besuat dhe na mbështetët. Jam dëshmitar i miqësisë së vërtetë.

Marrëdhëniet mes dy shteteve janë të lidhura me fijet e forta të miqësisë por edhe në fushën e bashkëpunimit politik kulturor.

Jemi të përkushtuar në ndërtimin e një shoqërie për t ë gjithë pa dallime etnike apo sociale. Synimi ynë është krijimi i një shteti demokratik, prandaj punojmë me përkushtim,” tha Xhaferi. Tashmë kur ky Protokoll quhet i miratuar nga Parlamenti i Shqipërisë, i tillë nuk është edhe për dy deputetët minoritarë grek, Vangjel Tavo i LSI-së, dhe Vangjel Dule i PBDNJ-së. Në fillim të seancës Vangjel Dule ishte prezent por jo edhe gjatë procesit të votimit, ndërsa Vangjel Tavo ishte i qartë, nuk erdhi fare.