Seancë plenare, Berisha deputetëve të PS: Gaz lotsjellës, kafka dhe kocka të thyera i meritoni ju, jo të rinjtë!

Këta parlamentarë e meritojnë gazin lotsjellës, plumbat e gomës, kafkat e çara, kockat e thyera, jo të rinjtë, u shpreh Kryetari i Partisë Demokratike, nga foltoja e parlamentit ku seanca plenare nisi me tensione sapo opozita hyri në seancë me pankarta nga protesta e studentëve në dy javët e fundit.

“Të dashur qytetarë dhe qytetare që ndiqni këtë seancë, java dhe ditët që kaluan, Tirana pa barbaritë më të mëdha ndaj të rinjve shqiptarë, barbari të papara gjatë asnjë pushtimi.

Në rrugët e Tiranës u thyen kocka të rinjsh, u çanë kafka, mjetet më të egra u përdorën kundër të rinjve.
Këta parlamentarë që shihni këtu, këta janë më kriminelë se ata që thyejnë kocka, se ata që çajnë kafka.
Këta janë kriminelë dhe këta e meritojnë gazin lotsjellës, plumbat e gomës, kafkat e çara, kockat e thyera, jo të rinjtë,” tha Sali Berisha ndërsa Kryetari i Parlamentit, Niko Peleshi, vendosi t’i hiqte fjalën duke theksuar se këto deklarata ishin thirrje për dhunë, duke e ndëshkuar me pamundësi që të fliste më përgjatë gjithë ditës.

Ndërkohë që Niko Peleshi njoftoi mbylljen e seancës për 10 minuta, Sali Berisha nuk pranoi që të ikte nga foltorja e Parlamentit dhe u lidh live përmes rrjetit social Facebook.

“Të dashur qytetarë dhe qytetare, ky grup i strukturuar kriminal i Partisë Socialiste, injoron të gjitha zhvillimet në rrugë, revoltën studentore dhe bën sikur nuk ka ndodhur asgjë.
Këta mbrojnë krimet e tyre.
Këta mbrojnë pasuritë e vjedhura.
Këta mbrojnë vrasjet që kanë porositur.
Këta janë më kriminelët në Shqipëri.
Këta janë më kriminelë se ata që ndodhen në qeli.
Ikni, ikni edhe ju.
Ikni se do ikni.
E keni parë ju se çfarë u bëjnë në debate? Se si ia nxijnë fytyrën si legeni? Se si ua nxjerrin fytyrën?
Si ka mundësi mor që ngriheni kundër studentëve, ngriheni kundër fëmijëve të shqiptarëve?
Pasi u keni vrarë shpresën, doni t’i vrisni fizikisht.
A e kuptoni ju pse luftojnë studentët?
A e kuptoni betejën e tyre?
Është betejë për çdo shqiptar, është betejë për këtë vend, për të ardhmen e tij, të cilën ia rrëmbyet, të cilën e shndërruat në pasuri përrallore, e shndërruat në konto bankare të pafundme, në vila e pallate.
Në Evropë dhe në botë nuk ka një grup më kriminal se ju.
Kaq është i Koresë së Veriut, por ai është për arsye ideologjike, jo për vjedhjen e qytetarëve.
A e kuptoni apo jo, nuk keni vend në parlament ju, vendi juaj është tek ata që i përdorni si mercenarë kundër studentëve.
Ndaj dhe largohuni nga parlamenti i krimit, nga parlamenti i hajdutëve më të mëdhenj, por mbi të gjitha i avoketërve të shpifur të një padrinoje.
Fatin e Çausheskut do ketë po vazhdoi kështu.
Po më mirë të zgjedhë fatin e padronit të tij, Vuçiç.
Pra, ju mbështesni gangsterin, ju mbështesni Padrinon, Ramaduron, kreun e organizatës kriminale.
Ju mbështesni njeriun që u ka vjedhur shqiptarëve miliarda.
Ju mbështesni njeriun që shet Shqipërinë, armikun e egër të Kosovës.
Ju mbështesni një skllav, një argat të shpifur të Beogradit.
Nuk nxorët mësime, do ta pësoni më keq se ai në fund të fundit pati një mençuri, tha më mirë në burg se sa i tërhequr zvarrë.
Kurse ju mendoni se do qëndroni në këto karrige,” tha Kryetari i PD Sali Berisha, duke përfunduar:

“U ka ardhur fundi.
Ju jeni fundi. Ju jeni eksponentë të narkoshtetit që ju ndërtuat në Shqipëri duke mbështetur Edi Ramën për narkoshtetin e parë dhe të vetëm në Evropë.
Ju mjeruat shqiptarët, ju shkatërruat qindra mijëra vende pune.
Ju jeni të pluhurosur të gjithë, të gjithëve u vjen era kokainë dhe kanabis.
Ju keni ndërtuar parajsën mbi krimin dhe ajo parajsë do jetë ferri juaj. Ferri i merituar.”

Ndryshe, seanca e sotme plenare e Parlamenti të Shqipërisë nisi me tensione ku deputetët e opozitës hynë në seancë me pankarta nga protesta e studentëve në dy javët e fundit, dhe kur Kryetari i Parlamentit, Niko Peleshi, filloi të lexoi rendin e ditës, deputetët e PD filluan të përplasnin duart në tavolinat e tyre për të moslejuar zhvillimin e seancës, për shkak të dhunës policore ndaj të rinjve në protesta.